کشتواڑ میں حزب کے دہشت گرد جہانگیر سروری کی کمین گاہ کا پردہ فاش

جموں//
سیکورٹی فورسز نے جموں کشمیر کے ضلع کشتواڑ میں حزب المجاہدین سے وابستہ ملی ٹنٹ جہانگیر سروری کی کمین گاہ کا پردہ فاش کرکے اس کو تباہ کیا ہے ۔
ایس ایس پی کشتواڑ خلیل پوسوال نے میڈیا کو بتایا کہ ہمیں مصدقہ اطلاعات تھیں کہ بھادت سرور کے پری باغ علاقے میں جہانگیر سروری ملی ٹنٹ کی نقل و حمل ہوئی ہے اور وہ اس علاقے میں رکا ہوا ہے ۔
پوسوال نے کہا کہ اس اطلاع پر کارروائی کرتے ہوئے پولیس نے فوج کی ۲۶آر آر اور سی آر پی ایف کی ۵۲ویںبٹالین کی مدد سے تلاشی آپریشن شروع کر دیا۔ان کا کہنا تھا کہ اس دوران دو ٹھکانے مل گئے جن میں سے ایک اس کی سابقہ کمین گاہ تھی جس میں کچھ بھی نہیں تھا۔
ایس ایس پی نے کہا کہ دوسری جگہ جو کمیں گاہ تھی وہاں سے کچھ کمبل، کھانے پینے وغیرہ جیسی چیزیں بر آمد کی گئیں۔انہوں نے کہا کہ پوچھ تاچھ کیلئے کچھ مشکوک افراد کو طلب کیا گیا ہے ۔ان کا کہنا تھا کہ پورے علاقے میں آپریشن جاری ہے ۔