ریاسی:مفرور دہشت گرد کی تلاش کیلئے کئی علاقوںکا محاصرہ

جموں//
جموںکشمیر کے ریاسی ضلع کے چسانہ گاؤں میں دوسرے روز بھی دہشت گرد مخالف آپریشن جاری رہا۔ پیر کی سہ پہر سیکورٹی فورسز کے ساتھ تصادم کے دوران ایک عدم شناخت دہشت گردماراگیا جبکہ دوسرے نے رہائشی مکان میں پناہ حاصل کی۔
ذرائع نے بتایا کہ جاں بھق دہشت گرد کا ساتھی سیکورٹی فورسز کو چکمہ دے کر فرار ہونے میں کامیاب ہوا جس کی بڑے پیمانے پر تلاش شروع کی گئی ہے ۔
دفاعی ذرائع نے بتایا کہ منگل کی صبح جوں ہی سیکورٹی فورسز کے اہلکار رہائشی مکان کے اندر گئے تو وہاں پر جاں بحق دہشت گرد کا ساتھی موجود نہیں تھا ۔
ان کے مطابق چسانہ کا تولی گاؤں پہاڑی علاقہ ہے اور اسی کا فائدہ اٹھا کر دہشت گرد رات کے دوران چکمہ دے کر فرار ہونے میں کامیاب ہوا ہے ۔انہوں نے کہاکہ مفرور دہشت گرد کو تلاش کرنے کی خاطر نصف درجن کے قریب گاوں کو محاصرے میں لے کر تلاشی آپریشن کا دائرہ وسیع کیا گیا جبکہ اضافی کمک کو بھی جنگلی علاقے کی اور روانہ کیا گیا ہے ۔
ذرائع کا مزید کہنا تھا کہ جنگلی علاقے کو سیکورٹی فورسز نے پوری طرح سے سیل کرکے فرار ہونے کے سبھی راستوں پر پہرے بٹھا دئے ہیں۔دفاعی ذرائع نے بتایا کہ پیر کے روز سیکورٹی فورسز کی فائرنگ میں مارے گئے دہشت گرد کی لاش برآمد کی گئی اور اس کے قبضے سے ایک رائفل ، دو میگزین اور دوسرا قابل اعتراض مواد برآمد کرکے ضبط کیا گیا۔
جموں میں مقیم دفاعی ترجمان لیفٹیننٹ کرنل سنیل برتوال نے منگل کے روزبتایاکہ ریاسی کے چسانہ گاؤں میں ایک ہارڈ کوردہشت گرد مارا گیا جس کے قبضے سے بڑی مقدار میں اسلحہ وگولہ بارود اور قابل اعتراض مواد برآمد کیا گیا ہے ۔
کرنل برتوال نے کہاکہ علاقے میں اور ایک دہشت گرد ٹینٹ چھپا بیٹھا ہے جس کومار گرانے کی خاطر گاؤں میں دوسرے روز بھی تلاشی آپریشن جاری رہا۔ان کا مزید کہنا تھا کہ سیکورٹی فورسز نے ایک وسیع علاقے کو محاصرے میں لے رکھا ہے ۔