سرینگر/۵اگست
پی ڈی پی صدر اور سابق وزیر اعلیٰ محبوبہ مفتی کا کہنا ہے کہ انہیں پارٹی کے دیگر سینئر لیڈروں کے ساتھ ہفتے کے روز خانہ نظر بند رکھا گیا۔
محبوہ نے ہفتے کو اپنے ٹویٹر ہینڈل پر ٹویٹ کرکے کہا”آج مجھے پارٹی کے دیگر سینئر لیڈورں کے ساتھ خانہ نظر بند رکھا گیا، یہ نیم شب کے کریک ڈاﺅن کے بعد ہوا جب میری پارٹی کے متعدد کارکنوں کو تھانوں میں غیر قانونی طور پر بند رکھا گیا“۔
ان کا ٹویٹ میں کہنا تھا”سپریم کورٹ کے سامنے حکومت ہند کے نارملسی کے دعوے بے نقاب ہوگئے “۔
محبوبہ نے اپنے ایک اور ٹویٹ میں کہا”ایک طرف سری نگر میں بڑے ہورڈنگس جن میں کشمیریوں کو دفعہ 370 کی منسوخی کا جشن منانے کو کہا گیا ہے ، کو لگایا گیا ہے ، جبکہ لوگوں کی حقیقی جذبات کو دبانے کےلئے طاقت کا استعمال کیا جا رہا ہے “۔
پی ڈی پی کی صدرنے ٹویٹ میں مزید کہا”امید ہے کہ عدالت عظمیٰ ایک ایسے وقت جب دفعہ 370 کی سماعت چل رہی ہے ، ایسی پیش رفت کا نوٹس لے گی“۔
دریں اثنا بی جے پی سری نگر میں دفعہ 370 کی منسوخی کی چوتھی برسی پر کئی تقریبوں کا اہتمام کر رہی ہے ۔
