جمو ں کشمیر میں امسال اب تک ۷۲ ملی ٹنٹ ہلاک

نئی دہلی//
ہندوستانی فوج کے ساتھ مشترکہ آپریشن میں، سینٹرل ریزرو پولیس فورس نے اس سال جموں کشمیر میں ۲۷ملی ٹنٹوں کو ہلاک کیا ہے۔
سی آر پی ایف نے بتایا کہ اس فہرست میں آٹھ مقامی اور۱۹غیر ملکی ملی ٹنٹ شامل ہیں جنہیں اس سال ۵ جولائی تک جموں کشمیر میں مار ڈالا گیا۔
سی آر پی ایف کے ایک سینئر آفیسرکاکہنا ہے’’سال ۲۰۲۲میں، مجموعی طور پر۱۸۷دہشت گردوں کو سیکورٹی فورسز نے وادی میںہلاک کیا جس میں۱۳۰مقامی دہشت گرد اور ۵۷غیر ملکی دہشت گرد شامل ہیں‘‘۔
آفیسر نے بتایا کہ اگر وہ پچھلے سالوں سے موازنہ کریں تو وادی میں غیر ملکی دہشت گردوں میں زبردست کمی آئی ہے۔ان کاکہنا تھا’’اس سال مختلف کارروائیوں میں۱۶نکسلیوں کو گرفتار کیا گیا ہے‘‘۔
۲۳جون کو کپواڑہ کے مچھل سیکٹر کے کالا جنگل میں ایک مشترکہ آپریشن میں چار ملی ٹنٹ مارے گئے تھے۔
آفیسر کاکہنا تھا کہ جموں و کشمیر نے دہشت گردی کو شکست دی ہے اور ایک پسماندہ اور دہشت گردی سے متاثرہ خطے سے ملک کے سب سے زیادہ متحرک مقامات میں سے ایک میں تبدیل ہو گیا ہے۔
ایک سرکاری عہدیدار کاکہنا ہے کہ آرٹیکل۳۷۰ کی منسوخی‘ جو کہ آئین میں ایک عارضی شق تھی‘ کے بعد حکومت نے جموں و کشمیر کے لوگوں کو سماجی و اقتصادی بااختیار بنانے کیلئے لامتناہی مواقع کھولنے کیلئے متعدد اصلاحی اور نوجوانوں پر مبنی اقدامات کیے ہیں اور اس کے نتائج واضح ہیں۔ (ایجنسیاں)