جموں میں قتل کے الزام میں چھ گرفتار:پولیس

جموں/
جموں کے مضافاتی علاقے کھوڑ چیک ملال گاوں میں ٹریکٹر نے مبینہ طورپر ایک شخص کو ٹکر مار کر موقع پر ہی ہلاک کیا ۔
پولیس نے جوں ہی اس معاملے کی تحقیقات شروع کی تو پتہ چلا کہ یہ حادثہ نہیں منصوبہ بند قتل ہے جس کے بعد چھاپہ ماری کے دوران چھ ملزمان کو دھر دبوچ کر سلاخوں کے پیچھے دھکیل دیا گیا۔
پولیس کے ایک ترجمان نے بتایا کہ ۲۱جو ن کو جموں کے کھوڑ چیک ملال گاوں میں ٹریکٹر کی ٹکر سے ایک شخص کی موت واقع ہوئی۔انہوں نے بتایا کہ پولیس نے دفعہ۱۷۴کے تحت کیس درج کرکے تحقیقات شروع کی اور بعد ازاں پتہ چلا کہ یہ حادثہ نہیں بلکہ ایک منصوبہ بند قتل ہے ۔
ترجمان کے مطابق پولیس نے تحقیقات کا دائرہ وسیع کرتے ہوئے چھ ملزمان کو کٹھوعہ ، سانبہ اور ریاسی اضلاع سے چھاپہ مار کارروائیوں کے دوران گرفتار کیا جبکہ ٹریکٹر کو بھی ضبط کیا گیا ہے ۔
پولیس نے گرفتار ملزمان کی شناخت مدن لال ، اس کی اہلیہ سوما دیوی ، سدیش کمار عرف شنڈا، اس کی اہلیہ نیلم کماری اور سورن سنگھ عرف گوشا اس کی اہلیہ سیما دیوی کے طورپر کی ہے ۔