اپنی پارٹی کے صدر کی دہلی میں وزیر داخلہ سے ملاقات

نئی دہلی//
اپنی پارٹی کے صدر‘ سید محمد الطاف بخاری نے منگل کومرکزی وزیر داخلہ امت شاہ پر زور دیا کہ وہ جموں و کشمیر میں اسمبلی انتخابات کا اعلان کریں اور مرکزی زیر انتظام علاقے میں سرکردہ مذہبی رہنماؤں کو نظر بندی سے رہا کریں۔
جاری کردہ ایک بیان کے مطابق، اپنی پارٹی کے صدر نے آج دہلی میں وزیر داخلہ سے ملاقات کی۔
بخاری نے مروجہ عوامی جذبات کو مزید تقویت دینے کے لیے مرکزی حکومت کو فوری طور پر’اعتماد سازی کے اقدامات‘کرنے کی ضرورت پر زور دیا۔
بیان میں کہا گیا کہ بخاری نے وزیر داخلہ کو آنے والی عید سے قبل ممتاز مذہبی رہنماؤں کی رہائی کے لیے ضروری کام کرنے اور مرکز کے زیر انتظام علاقے میں اسمبلی انتخابات کا اعلان کرنے کے لیے کہا۔
بخاری نے کہا کہ میر واعظ عمر فاروق، مولانا عبدالرشید داؤدی اور مولانا مشتاق احمد ویری سمیت ممتاز مذہبی رہنماؤں ‘جو اپنے اپنے گھروں میں نظر بند ہیں‘ کی رہائی کا مطالبہ یہ کرتے ہوئے کیا کہ یہ ماحول کو مزید مثبت جذبے سے بھر دے گا۔
اپنی پارٹی کے صدر نے کہا ’’یہ بااثر شخصیات وادی میں منشیات کے استعمال سمیت سماجی برائیوں کو ختم کرنے میں اہم کردار ادا کرنے کی صلاحیت رکھتی ہیں۔ مزید برآں، خطے میں اسمبلی انتخابات کا طویل انتظار کا اعلان لوگوں میں سیاسی بااختیار بنانے کا احساس پیدا کرے گا۔ یہ اقدامات نہ صرف ایک مثبت ماحول کو فروغ دیں گے بلکہ جموں و کشمیر میں لوگوں کو بااختیار بنانے اور جمہوری عمل کو برقرار رکھنے کے حکومت کے عزم کی بھی نشاندہی کریں گے‘‘۔
بخاری اور شاہ نے وسیع پیمانے پر مسائل پر تبادلہ خیال کیا، جس کا مقصد موجودہ امن کو بڑھانا، ترقی کو فروغ دینا، حکمرانی کو بہتر بنانا اور خطے میں سیاسی حرکیات کو حل کرنا ہے۔
ملاقات کے دوران بخاری نے وزیر داخلہ کو ’’جموں و کشمیر میں امن اور ہم آہنگی کی موجودہ حالت‘‘ کے بارے میں آگاہ کیا۔
بخاری نے وزیر داخلہ کو بتایا کہ جموں کشمیر کے لوگوں نے پرامن ماحول کیلئے اپنی وابستگی کا مظاہرہ کرتے ہوئے امن کو فروغ دینے اور اسے برقرار رکھنے میں اہم کردار ادا کیا ہے۔
جلد ہی شروع ہونے والی امرناتھ یاترا کا خیرمقدم کرتے ہوئے،اپنی پارٹی کے صدر نے وزیر داخلہ کو بتایا کہ جموں و کشمیر کے لوگ یاتریوں کا استقبال کرنے کے لیے بے تاب ہیں کیونکہ اس یاترا نے ہمیشہ مذہبی ہم آہنگی کو فروغ دینے، ثقافتی رشتوں کو مضبوط کرنے‘جموں و کشمیر کے لوگوں کیلئے اہم اقتصادی فوائد اور پیداوار میں اہم کردار ادا کیا ہے۔