کولگام تصادم آرائی میں البدر کا مقامی جنگجو مارا گیا‘ پولیس اہلکار زخمی

سرینگر//
جنوبی ضلع کولگام کے ہاوورا گاؤں میں درمیانی شب سیکورٹی فورسز اور ملی ٹینٹوں کے مابین تصادم آرائی میں مقامی ملی ٹینٹ مارا گیا جبکہ ابتدائی فائرنگ میں پولیس اہلکار شدید طورپر زخمی ہوا اور اس کو علاج ومعالجہ کی خاطر نزدیکی ہسپتال منتقل کیا گیا۔
پولیس کے ایک ترجمان نے بتایا کہ کولگام کے ہاوورا گاوں میں ملی ٹینٹوں کے چھپے ہونے کی ایک خاص اطلاع موصول ہونے کے بعد جوں ہی سلامتی عملے نے گاوں کو محاصرے میں لے کر تلاشی آپریشن شروع کیا تو اسی اثنا میں مشتبہ مقام پر موجود جنگجو نے فورسز پر اندھادھند فائرنگ شروع کی۔
ترجمان نے کہاکہ ابتدائی فائرنگ میں ایک پولیس اہلکار گولی لگنے سے زخمی ہوا جس کو علاج ومعالجہ کی خاطر نزدیکی ہسپتال منتقل کیا گیا۔
ترجمان نے بتایا کہ مقامی ملی ٹینٹ کو خود سپردگی کرنے کا بھر پور موقع فراہم کیا گیا تاہم اس نے سیکورٹی فورسز پر فائرنگ کا سلسلہ جاری رکھا ۔
ان کے مطابق سیکورٹی فورسز کی جوابی کارروائی میں جنگجو مارا گیا جس کی بعد میں شناخت عادل مجید لون ولد عبدالمجید لون ساکن اکبر آباد ہاوورا کولگام کے بطور ہوئی ہے ۔
پولیس نے کہاکہ تصادم کی جگہ ایک پستول ، گرینیڈ، گولیوں کے راونڈ اور دوسرا قابل اعتراض مواد برآمد کرکے ضبط کیا گیا۔
پولیس نے اس سلسلے میں کیس درج کرکے مزید تحقیقات شروع کی۔