’ اسمبلی انتخابات میں نیشنل کانفرنس زمین بوس ہوگی‘

سرینگر/۱//
’’بھارتیہ جنتا پارٹی (بی جے پی) انتخابات کیلئے ہروقت تیار ہے خواہ وہ اسمبلی، بلدیاتی یا پھر پنچایتی انتخابات ہو۔ این سی پی ڈی پی نے بی جے پی کو اچھوت بنا کر رکھا تھا، آئندہ اسمبلی انتخابات میں نیشنل کانفرنس زمین بوس ہوگی‘‘۔
ان باتوں کا اظہار بی جے پی کے اسٹیٹ جنرل سیکریٹری اور سابق وزیر سنیل کمار شرما نے جنوبی کشمیر کے پلوامہ ضلع میں منعقدہ پارٹی پروگرام کے حاشیہ پر میڈیا نمائندوں کے ساتھ گفتگو کے دوران کیا۔
شرما نے میڈیا سے بات کرتے ہوئے نیشنل کانفرنس کے نائب صدر اور جموں و کشمیر کے سابق وزیر اعلیٰ عمر عبد اللہ کو تنقید کا نشانہ بناتے ہوئے کہا ’’این سی بوکھلاہٹ کا شکار ہے، بی جے ہر وقت انتخابات کیلئے تیار ہے اور بی جے پی ہی آنے والے وقت میں جموں وکشمیر میں اپنے دم پر سرکار بنائے گی۔‘‘
سابق ریاستی وزیر نے مزید کہا: ’’میں دعوے کے ساتھ کہہ رہا ہوں کہ بی جے پی جموں وکشمیر میں سرکار بنائے گی جب کہ نیشنل کانفرنس دو تین اضلاع تک ہی محدود ہو کر رہ گئی ہے اور جب تک انتخابات ہوں گے تب تک شاید عمر عبداللہ اکیلئے بھی ہو جائیں گے‘‘۔
بی جے پی لیڈر نے عمر عبداللہ کی جانب سے انتخابات کے حوالہ سے دیے گئے بیان پر ان کی تنقید کرتے ہوئے کہا ’’عمر عبداللہ خود کی اور پارٹی کی فکر کریں اور بی جے پی کی فکر کرنا چھوڑ دے۔‘‘
شرما کے مطابق ’’بھارتی جنتا پارٹی ہر ایک کے دل میں ہے اور ہر گھر میں موجود ہے۔‘‘ انہوں نے مزید کہا کہ ’’این سی اور پی ڈی پی جیسی جماعتوں نے بی جے پی کو اچھوت بنانا کے رکھا تھا تاہم آج لوگ ان کے حربوں سے باخبر ہو چکے ہیں اور بی جے پی کو ہی آئندہ انتخابات میں کامیاب ہوگی‘‘۔
بعد ازاں بی جے پی جنرل سیکریٹری نے پارٹی کارکنان سے میٹنگ کی صدارت کی جس میں انہوں نے مودی حکومت کے نو سال کے دوران کیے گئے کارناموں کے بارے میں جانکاری دی جبکہ کارکنان سے خطاب کرتے ہوئے کہا گیا کہ وہ انتخابات کیلئے تیار رہیں۔