سرینگر//
مسجد سے ویکیوم کلینر کی چوری کے ایک دن بعد بدھ کوچوروں نے سرینگر کے مہجور نگر علاقے میں ایک مسجد سے مہنگے نل چوری کر لئے۔
ایک مقامی خبر رساں ایجنسی نے جامعہ اہلحدیث مسجد میں مسجد کمیٹی کے ایک رکن کے حوالے سے بتایا کہ یہ واقعہ آج دن۱۲ بجے کے قریب اس وقت سامنے آیا جب مسجد کے غسل خانوں سے پانی کے بہنے کی آواز نے ایک مقامی شخص کو خبردار کیا جو نماز ظہر کی اذان دینے مسجد میں پہنچے تھے۔
کمیٹی کے رکن نے کہا کہ غسل خانوں کے تمام نلکے پانی کے بلاتعطل بہنے کے ساتھ غائب تھے۔
ایک مقامی رہائشی‘ لطیف احمد کے مطابق، مسجد سے اعلیٰ کوالٹی کے ایک درجن سے زیادہ نلکوں کو چوری کیا گیا ہے، ان کے بقول ’’یہ شاید منشیات کے عادی افراد کی کارستانی تھی‘‘۔
لطیف نے کہا کہ ان کے پاس نماز کے بعد مسجد کو بند کرنے کے علاوہ کوئی چارہ نہیں بچا ہے۔
مسجد انتظامیہ نے مسجد کے اندر اور باہر سی سی ٹی وی کیمرے لگانے کا فیصلہ کیا ہے۔