جموں/۵جون
جموںکشمیر پولیس پاکستان یا پاکستان زیر قبضہ کشمیر میں مقیم ضلع کشتواڑ سے تعلق رکھنے والے مختلف تنظیموں سے وابستہ 36 جنگجووں کو گرفتار کرنے کے لئے بہت جلد انٹرپول کے ساتھ رابطہ قائم کرسکتی ہے ۔
اطلاعات کے مطابق ضلع کشتوارڑ سے تعلق رکھنے والے 36ملی ٹینٹوں کو پکڑنے کی خاطر جموں وکشمیر پولیس بہت جلد انٹر پول کے ساتھ رابط قائم کر سکتی ہے ۔
ذرائع نے بتایا کہ ضلع کشتواڑ سے تعلق رکھنے والے 36ملی ٹینٹ جو پاکستانی زیر قبضہ کشمیر میں مقیم ہیں کی پہلے ہی شناخت مکمل ہو چکی ہے اور اب انہیں گرفتار کرنا باقی ہے ۔
ذرائع کے مطابق تمام شناخت شدہ افراد کی فہرست تیار کی گئی ہے اوران کے خلاف ناقابل ضمانت وارنٹ بھی جاری کئے گئے ہیں اور اب انہیں انٹر پول کی مدد سے گرفتار کرنے کی خاطر اقدامات اُٹھائے جارہے ہیں۔
پولیس ذرائع نے بتایا کہ اشتہاری قرار دئے گئے مذکورہ ملی ٹینٹ سوشل میڈیا سائٹوں کا سہارا لے کر مقامی نوجوانوں کو ملی ٹینٹ صفوں میں شامل کرانے کی خاطر انہیں اکسا رہے ہیں۔
انہوں نے مزید کہاکہ مذکورہ ملی ٹینٹوں کو ڈوڈہ، کشتواڑ اور رام بن میں ملی ٹینسی کو پھر سے فروغ دینے کی خاطر کام سونپا گیا ہے اور اس حوالے سے پولیس کو کچھ سراغ بھی ملے ہیں۔
معلوم ہوا ہے کہ جموں وکشمیر پولیس نے پاکستان میں مقیم 36ملی ٹینٹوں کی جائیدادوں کی شناخت بھی کی ہیں اورا نہیں کسی بھی وقت قرق کرنے کا امکان ہے ۔
ذرائع کے مطابق خط چناب میں مقامی نوجوانوں کو ملی ٹینسی سے دور رکھنے کی خاطر سیکورٹی ایجنسیوں کی جانب سے مختلف نوعیت کے اقدامات اُٹھائے جارہے ہیں۔
ان کے مطابق مقامی نوجوانوں کو کھیل کود کی سرگرمیوں، ہنر مندی ، تعلیم اور دیگر پروگراموں کی طرف مائل کیا جارہا ہے تاکہ وہ سماج دشمن عناصر کے شر سے محفوظ رہ سکے ۔