سی سی ٹی وی تنصیب کے حکم نامے پر من وعن عملدرآمد ہونی چاہئے :اسد

سرینگر//
شہر سرینگر کے اہم ترین بازاروں میں۱۹؍اپریل سے سی سی ٹی وی نصب کرنے کی ڈیڈ لائن مقرر کی گئی ہے تاہم تاجروں نے اس ضمن میں انتظامیہ سے مزید مہلت مانگی ہے ۔
ضلع ترقیاتی کمشنر اعجاز اسد کے مطابق جو کہا گیا ہے اس پر عملدرآمد ہونی چاہئے ۔
یو این آئی نامہ نگار نے بتایا کہ شہر سرینگر کے اہم تجارتی مراکز میں سی سی ٹی وی کیمرے نصب کرنے کے حوالے سے انتظامیہ نے جو ڈیڈ لائن مقرر کی تھی وہ منگل کو ختم ہونے جا رہی ہے ۔
تاجروں نے ضلع انتظامیہ سے اپیل کی ہے کہ اُنہیں مزید مہلت دی جائے کیونکہ مالی لحاظ سے دکانداروں کو سخت مشکلات کا اس وقت سامنا کرنا پڑرہا ہے ۔
جموں وکشمیر پولیس کی جانب سے بھی دکانداروں کو آگاہی فراہم کی گئی کہ وہ جلدا زجلد سی سی ٹی وی کیمرے نصب کریں بصورت دیگر اُن کے خلاف قانون کے مطابق کارروائی عمل میں لائی جائے گی۔
پیر کے روز سرینگر میں نامہ نگاروں سے مختصر بات چیت کے دوران جب ضلع ترقیاتی کمشنر اعجاز اسد سے سی سی ٹی وی نصب کرنے کے بارے میں سوال کیا گیا تو انہوں نے بتایا کہ اس سوال کے جواب میں مجھے وہی کہنا ہے جو آرڈر میں لکھا ہوا ہے ‘‘۔
اگر چہ ضلع ترقیاتی کمشنر نے اس حوالے سے وضاحت نہیں کی تاہم اتنا ضرور کہا کہ جو حکم نامے میں لکھا گیا ہے اُس پر عمل ہونی چاہئے ۔
چونکہ ڈیڈلائن منگل کے روز ختم ہونے جارہی اب یہ دیکھنا دلچسپ ہوگا کہ انتظامیہ کی جانب سے اس حوالے سے کون سی نئی حکمت عملی اپنائی جائے گی۔