پاکستان میں ایم بی بی ایس کی نشستوں کی الاٹمنٹ‘ قاضی یاسر، ظفر بھٹ کے گھروںپر چھاپے

سرینگر//
انفورسمنٹ ڈائریکٹوریٹ(ای ڈی) نے جمعرات کو پاکستان میں ایم بی بی ایس کی نشستوں کی الاٹمنٹ سے منسلک ایک معاملے میں حریت رہنما قاضی یاسر اور جموں و کشمیر سالویشن موومنٹ کے چیئرمین ظفر بھٹ کے گھروں سمیت تین مقامات پر چھاپے مارے۔
ذرائع کے حوالے سے ایک مقامی خبر رساں ایجنسی نے اطلاع دی ہے کہ مرکزی تحقیقاتی ایجنسی نے مقامی پولیس کے ساتھ آج صبح سرینگر کے باغ مہتاب علاقے میں محمد اکبر بھٹ عرف ظفر بھٹ ’جو جے اینڈ کے سالویشن موومنٹ کے چیئرمین ہیں ‘کے گھر پر چھاپہ مارا۔
ذرائع نے بتایا کہ مرکزی تحقیقاتی ایجنسی کی ایک اور ٹیم نے آج صبح اننت ناگ کے قاضی محلہ علاقے میں حریت رہنما قاضی یاسر کے گھر پر بھی چھاپہ مارا۔انہوں نے کہا، ’’ایک ٹیم سرینگر کے باغات علاقے میں سید خالد گیلانی کے گھر پر بھی چھاپہ مار رہی ہے‘‘۔
ذرائع نے کہا کہ دونوں جگہوں پر چھاپے مارے جا رہے ہیں اور اس کے مطابق مزید تفصیلات شیئر کی جائیں گی۔
اہلکار نے کہا کہ پاکستان کے مختلف کالجوں میں جموں و کشمیر کے رہائشیوں کو ایم بی بی ایس کی نشستیں الاٹ کرنے کے معاملے کے سلسلے میں چھاپے مارے جا رہے ہیں۔