سرینگر//
جنوبی کشمیر کے پدگام پورہ اونتی پورہ میں سیکورٹی فورسز کے ساتھ تصادم میں دو مقامی جنگجو ہلاک جبکہ ابتدائی فائرنگ میں ایک فوجی جوان بھی ہلاک ہوا۔
ایڈیشنل ڈائریکٹر جنرل آف پولیس کشمیر رینج وجے کمار نے بتایا کہ جاں بحق ملی ٹینٹ کشمیری پنڈت سنجے شرما کی ہلاکت میں ملوث تھا۔
پولیس ذرائع کے مطابق حفاظتی عملے کو یہ اطلاع موصول ہوئی کہ ملی ٹینٹ اونتی پورہ کے پدگام پورہ گاؤں میں چھپے بیٹھے ہیں تو پولیس اور سیکورٹی فورسز نے مشترکہ طورپر فوراً اس علاقے کو درمیانی شب محاصرے میں لے لیا اور انہیں ڈھونڈ نکالنے کیلئے کارروائی شروع کی ۔
ذرائع نے کہاکہ فرار ہونے کے تمام راستے مسدود پا کر ملی ٹینٹوں نے حفاظتی عملے پر اندھا دھند فائرنگ شروع کی چنانچہ سلامتی عملے نے بھی پوزیشن سنبھال کر جوابی کارروائی کا آغاز کیا او راس طرح سے طرفین کے مابین جھڑپ شروع ہوئی۔
ان کے مطابق کچھ عرصہ تک جاری رہنے والی اس جھڑپ میں دو جنگجو ہلاک ہوے جن کی بعد میں شناخت عاقب مشتاق بٹ ساکن ملنگ پورہ اونتی پورہ اور اعجاز احمد بٹ ساکن سید آباد پستونہ ترال کے بطور ہوئی۔
عاقب مشتاق بٹ پہلے حزب کے ساتھ وابستہ تھا اور پچھلے کچھ مہینوں سے وہ ٹی آر ایف کے لے کام کر رہا تھا۔ اعجاز احمد بٹ جیش سے وابستہ تھا۔
وجے کمار کا مزید کہنا تھا کہ عاقب جنوری۲۰۲۱سے سرگرم تھا جبکہ اعجاز نے سال۲۰۲۲میں ملی ٹینٹ تنظیم میں شمولیت اختیار کی۔انہوں نے کہاکہ کشمیری پنڈت سنجے کمار کی ہلاکت میں ملوث ملی ٹینٹ کو دو دنوں کے اندر اندر مار گرایا گیا۔انہوں نے بتایا کہ جاں بحق جنگجوؤں کے خلاف بہت سارے مقدمات بھی درج ہیں اور وہ سیکورٹی ایجنسیوں کو انتہائی مطلوب تھے ۔
کمار نے کہا کہ لاجورہ پلوامہ میں غیر مقامی مزدوروں پر حملوں میں بھی ان کا ہاتھ رہا ہے جبکہ ترال میں ہتھیار چھیننے کے ایک واقعے میں بھی ان کے خلاف مقدمہ درج تھا۔انہوں نے کہاکہ تصادم کی جگہ اسلحہ وگولہ بارود اور قابل اعتراض مواد برآمد کرکے ضبط کیا گیا۔انہوں نے مزید بتایا کہ ملی ٹینٹوں کی ابتدائی فائرنگ میں دو فوجی زخمی ہوئے جن میں سے بعد میں ایک اہلکار ہسپتال میں زخموں کی تاب نہ لا کر دم توڑ بیٹھا۔
کشمیر زون کے ایڈیشنل ڈائریکٹر جنرل آف پولیس وجے کمار نے بتایا کہ پدگام پورہ گاوں میں ملی ٹینٹوں کی موجودگی کی اطلاع موصول ہونے کے بعد سیکورٹی فورسز نے پیر اور منگل کی درمیانی شب علاقے کو محاصرے میں لے کر تلاشی آپریشن شروع کیا۔انہوں نے بتایا کہ منگل اعلیٰ الصبح سلامتی عملے نے جوں ہی مشتبہ مقام کی اور پیش قدمی شروع کی تووہاں پر موجود جنگجووں نے فورسز پر اندھا دھند فائرنگ شروع کی ۔
ان کے مطابق سیکورٹی فورسز کی جوابی کارروائی میں ایک مقامی جنگجو مارا گیا جس کی بعد میں شناخت عاقب مشتاق بٹ کے بطور ہوئی ۔
اے ڈی جی پی نے بتایا کہ جاں بحق ملی ٹینٹ کشمیری پنڈت سنجے شرما کی ہلاکت میں براہ راست ملوث تھا۔انہوں نے کہاکہ عاقب مشتاق نے پہلے حز ب المجاہدین میں شمولیت اختیار کی اور بعدازاں ٹی آر ایف نامی ممنوع تنظیم میں شامل ہوئے ۔انہوں نے بتایاکہ تصادم کی جگہ اسلحہ و گولہ بارود اور قابل اعتراض مواد برآمد کرکے ضبط کیا گیا۔
دریں اثنا پولیس نے عوام سے پر زور اپیل کی ہے کہ وہ جائے تصادم پر جانے سے تب تک گریز کیا کریں جب تک اسے پوری طرح سے صاف قرار نہ دیا جائے کیونکہ پولیس اور دیگر سلامتی ادارے لوگوں کے جان و مال کی محافظ ہے لہذا لوگوں کی قیمتی جانوں کو بچانے کیلئے پولیس ہر ممکن کوشش کرتی ہے ۔