جموں میں سی آر پی ایف کانسٹیبل نے خودکشی کرلی

جموں//
جموں کے نوشہرا میں سینٹرل ریزرو پولیس فورس(سی آر پی ایف )کانسٹیبل نے دوران ڈیوٹی خود پر گولی چلا کر خود کشی کر لی ہے ۔
سی آر پی ایف ذرائع نے بتایا’’جاں بحق سی آر پی ایف اہلکار نے ظاہری طور پر خودکشی کرلی ہے ۔ لاش کو پوسٹ مارٹم کیلئے بھیجا گیا ہے ۔ موت کی اصل وجہ جاننے کیلئے تحقیقات ہوگی‘‘۔
ذرائع نے بتایا کہ نوشہرا جموں میں ۲۴۵ویںبٹالین سے وابستہ کانسٹیبل سارتھ نے دوران ڈیوٹی خود پر گولی چلائی۔انہوں نے کہاکہ گولی چلنے کی آواز سنتے ہی وہاں پر تعینات دوسرے سی آر پی ایف اہلکار جائے وقوع پر پہنچے اور زخمی اہلکار کو علاج ومعالجہ کی خاطر طبی مرکز منتقل کیا جہاں ڈاکٹروں نے اسے مردہ قرار دیا۔
سی آر پی ایف اہلکار کے قبضے سے ایسا کوئی دستاویز برآمد نہیں ہوا ہے جس سے یہ معلوم ہوجائے کہ اس نے خودکشی کا قدم کیوں اٹھایا۔
قابل ذکر ہے کہ سیکورٹی اداروں کی جانب سے یوگا اور آرٹ آف لیونگ کی سرگرمیاں متعارف کرانے کے باوجود بھی جموں وکشمیر میں تعینات سیکورٹی فورس اہلکاروں میں خودکشی کے رجحان میں کوئی کمی نہیں آرہی ہے ۔