مزکری وزارت داخلہ کا اعلی سطحی وفد یونین ٹریٹری کے تین روزہ دورے پر

سرینگر//
جی ٹوینٹی کی میزبانی کی تیاریوں کے بیچ جموں کشمیر میں مزکری وزارت داخلہ کا ایک اعلی سطحی وفد یونین ٹریٹری کے تین روزہ دورے پر آرہا ہے۔
وفد کی قیادت مرکزی وزارت داخلہ میں جموں کشمیر و لداخ کے جوائنٹ سیکرٹری پرشانت لوکھنڈے کر رہے ہیں۔یہ وفد آج جموں پہنچ گیا۔
وفد جموں کشمیر کے لیفٹیننٹ گورنر منوج سنہا اور چیف سیکریٹری ڈاکٹر ارون کمار مہتا سے جموں میں ملاقات کرے گا اور مختلف معاملات کا جائزہ لے گا‘جن میں موجودہ صورتحال‘ جی ٹوینٹی کی میزبانی کے متعلق تیاریاں قابل ذکر ہے۔
ذرائع کا کہنا ہے کہ وزارت داخلہ کا یہ وفد دو مارچ کو دہلی واپس روانہ ہوگا اور صورتحال و دیگر امورات کا مفصل رپورٹ وزیر داخلہ کو پیش کرے گا۔
وفد جموں کشمیر پولیس کے ڈائریکٹر جنرل دلباغ سنگھ سے سکیورٹی صورتحال اور حالیہ کشمیری پنڈت سنجے کمار شرما کی ہلاکت کے حوالے سے جائزہ لے گا۔جموں کشمیر میں تعمیراتی امور اور پرائم منسٹر ڈیولپمنٹ پیکیج کے متعلق یہ اعلی سطحی افسران متعلقہ محکموں کے انتظامی سیکرٹریز سے جائزہ لیں گے۔
ذرائع کا کہنا ہے کہ جی ٹوینٹی کی میزبانی کے متعلق یہ وفد بالخصوص جموں و کشمیر کے لیے بھجیا گیا ہے اور یہ وفد جموں کشمیر میں جی ٹوینٹی اجلاس کی تیاریوں کے متعلق تبادلہ خیال کرے گا۔
غور طلب ہے کہ ان اجلاس میں جی ٹوینٹی ممالک کے اعلی سطحی وفود جی ٹوینٹی کے اقتصادی، صنعت اور دیگر امارت پر تبادلہ خیال کرے گا۔
گلمرگ میں گذشتہ چند ہفتوں سے جی ٹوینٹی اجلاس کو لیکر انتظامی سرگرمیوں نے طول پکڑ لیا ہے۔ گزشتہ دو ہفتوں میں محکمہ صحت کے سیکرٹری بھوپندر کمار نے گلمرگ کا دو مرتبہ دورہ کیا ہے اور وہاں کئی تیاریوں کا جائزہ لیا جن میں طبی سہولیات بھی شامل ہے۔
مذکورہ افسر نے گلمرگ میں طبی سہولیات و عملے کو مزید بڑھانے کی ہدایات دی ہیں جس پر محکمہ صحت کے ڈائریکٹر نے کام کرنا شروع کیا ہے۔اس کے علاوہ شہر سرینگر میں بھی بلواڈ اور لالچوک میں سڑکیں کو نئی سرے سے تعمیر کیا جارہا ہے جبکہ ڈرینیج و بجلی کے نظام میں بھی تجدید نو کا کام کیا جارہا ہے۔
بتادیں کہ بھارت نے دسمبر ۲۰۲۲ سے جی ٹونٹی کی میزبانی سنبھالی ہے اور اس دوران ملک کے مختلف شہروں میں جی ٹوینٹی اجلاس منعقد ہوں گے۔