ہاں ہم مانتے ہیں کہ … کہ کسی کا ہیرو کسی اور کا زیرو‘ کسی اور کا ولن ہو تا ہے اور…اور جب بات پاکستان اور ہندوستان کی ہو تو … یقینا ایک ملک کا ہیرو ‘ دوسرے ملک کازیروہوتا ہی ہے… لیکن … لیکن صاحب ہم اس دلیل کو نہیں مانتے ہیں اور بالکل بھی نہیں مانتے ہیں ‘ اگر آپ سچے اور اچھے ہیں تو آپ ہیرو ہیں ‘ اگر آپ جھوٹے اوربرے ہیں تو … تو آپ زیرو ہیں‘ ولن ہیں… ہمارے لئے پھر اس بات کے کوئی معنی نہیں رہتے ہیں کہ آپ پاکستان کے ہوں یا پھر آپ ہمارے اپنے بھارت دیش کے ۔ جاوید اختر …گزشتہ دنوں پاکستان میں تھے … ایک تقریب میں انہوں نے ممبئی حملوں کی بات کی … اختر کاکہنا تھا کہ وہ ممبئی کے رہنے والے ہیں اور… اور ممبئی میں جو کچھ بھی ہوا … ۲۰۰۸ میں ہوا وہ انہوں نے اپنی آنکھوں سے دیکھا‘وہ اسے ابھی تک بھلا نہیں پائے ہیں… انہوں نے ممبئی حملوں کے بارے میں کچھ اور بھی باتیںکیں اور شکوہ کیا کہ اس حملے میں جو ملوث ہیں وہ آج بھی پاکستان میں آزادی سے گھوم پھر رہے ہیں… اس تقریب میں موجود بیشترلوگوں نے اختر کی باتوں سے اتفاق کیا اور… اور ان کی اس بے باکی اور صاف گوئی پر تالیاں بھی بجائیں۔لیکن… لیکن بعد ازاں سوشل میڈیا پر ایک طوفان برپا ہو گیا… پاکستانی صارفین نے اختر کی ’ہرزہ سرائی ‘پر ان کی خوب مذمت کی … دوسری جانب بھارتی صارفین ‘جو آئے دن اختر کو نشانہ بناتے رہتے ہیں ‘ ان میں سے کچھ ایک انہیں پاکستان جانے کا بھی مشورہ دیتے ہیں ‘ انہوں نے ان کی خوب تعریف کی اور… اور ان کے بیان کو سرجیکل اسٹرائک سے تشبیہ دی جبکہ کچھ ایک نے کہا کہ اختر نے پاکستان کو گھر میں گھس کر مارا ۔بھارتی صارفین کیا کہتے ہیں اور کیا نہیں وہ رہنے دیجئے‘ لیکن… لیکن صاحب ہم ایک بات پاکستانی صارفین سے کہنا چاہتے ہیں …یہ کہنا چاہتے ہیں کہ ہندوستان ایک حقیقت ہے‘ ممبئی ہندوستان کا ایک حصہ ہے‘ یہ بھی ایک حقیقت ہے‘ اس پر ۲۰۰۸ میں حملہ ہوا وہ بھی ایک حقیقت ہے‘ حملے میں ۲۶۶؍افراد مارے گئے وہ بھی ایک حقیقت ہے‘ حملہ آور پاکستان سے آئے تھے وہ بھی ایک حقیقت ہے ‘ ان حملہ آوروں کو حملے کے دوران پاکستان سے ہدایات مل رہی تھیں وہ بھی ایک حقیقت ہے‘ اس حملے کے پاکستانی منصوبہ ساز وں کو آج تک سزا نہیں دی گئی ‘ وہ بھی ایک حقیقت ہے ‘ جاوید اختر نے جو بات کہی وہ بھی ایک حقیقت ہے … ان کی بات سے پاکستان میں ایک حلقے کے تن بدن میں آگ لگ گئی وہ بھی ایک حقیقت ہے… کیوں لگ گئی ‘ اس حقیقت سے پلیزہمیں بھی آگاہ کیجئے اور … اور اس لئے کیجئے کیوںکہ اختر جو کہا وہ سچ کہا … سچ کے سوا کچھ اور نہیں کہا… بالکل بھی نہیںکہا ۔ ہے نا؟