جموں وکشمیر میں بہت جلد اسمبلی انتخابات ہو ں گے :ترون چھگ

جموں//
بھارتیہ جنتاپارٹی (بی جے پی)کے قومی جنرل سیکریٹری ‘ترون چھگ نے منگل کے روز کہاکہ جموں وکشمیر میں بہت جلد چناو ہونگے ۔
چھگ نے مزید بتایا کہ تین خاندانوں نے جموں کشمیر کو دہشت گردی کا دارلخلافہ بنایا لیکن مودی جی نے اسی جموں وکشمیر کا امن کا گہوارہ بنایا ۔
ان باتوں کا اظہار چھگ نے جموں میں نامہ نگاروں سے بات چیت کے دوران کیا۔
بی جے پی جنرل سیکریٹری نے کہاکہ بی جے پی خاندانی سیاست میں یقین نہیں رکھتی اور یہ کہ جب بھی الیکشن کا اعلان ہوگا بی جے پی اس کا خیر مقدم کرئے گی۔
چھگ نے بتایا کہ وزیر اعظم نریندر مودی نے ملک کے لوگوں سے وعدہ کیا ہے کہ جموںکشمیر میں بہت جلد چناؤ ہونگے اور اس پر عمل بھی ہوگا۔
اُن کے مطابق چناو کمیشن نے ووٹر لسٹ پر اعتراضات مانگے ہیں یہ عمل پورا ہونے کے بعد الیکشن کا بھی اعلان ہوگا۔
انسداد تجاوزات مہم کے بارے میں پوچھے گئے سوال کے جواب میں بی جے پی جنرل سیکریٹری نے کہاکہ سیاستدانوں نے سرکاری اراضی پر قبضہ کیا ہے اور اس کا چھڑانا بہت ضروری تھا۔
چھگ نے مزید بتایا کہ پی ڈی پی اور نیشنل کانفرنس سے وابستہ اکثر لیڈران نے سرکاری اراضی پر قبضہ کیا ہوا ہے ۔
دفعہ۳۷۰کی منسوخی کے بارے میں بی جے پی جنرل سیکریٹری نے کہاکہ وزیر اعظم مودی اس قانون کو ختم کرکے جموں وکشمیر کو حقیقی آزادی فراہم کی ۔
بی جے پی لیڈر نے مزید کہاکہ تین خاندانوں مفتی ، عبداللہ اور گاندھی نے ایک منصوبہ بند سازش کے تحت جموں وکشمیر کو دہشت گردی کا دارلخلافہ بنایا لیکن موجودہ مرکزی حکومت نے جموں وکشمیر کو امن کا گہوارا بنایا ۔
چھگ کے مطابق جموںکشمیر میں حالات پوری طرح سے معمول پر آئے ہیں ۔انہوں نے کہاکہ گاندھی خاندان اب کشمیر میں چھٹیاں منانے کی خاطر آرہا ہے ۔
بی جے پی کے قومی جنرل سکریٹری نے سابق وزیر اعلیٰ محبوبہ مفتی کو جموں و کشمیر کے لوگوں کے ساتھ ’فریب اور تباہ کن سیاست‘کھیلنے پر تنقید کا نشانہ بنایا۔
چھگ نے کہا کہ بی جے پی کو محبوبہ مفتی کے دھوکے باز کھیل کو بے نقاب کرنا چاہئے ۔انہوں نے کہا کہ محبوبہ جموں و کشمیر کے ہندوؤں کے مفاد کو نظر انداز کرتے ہوئے عسکریت پسندوں کیلئے سرخ قالین بچھاتی رہی۔
بی جے پی لیڈر نے کہا کہ اب جبکہ محبوبہ صورتحال کا فائدہ اٹھانے کی کوشش کر رہی ہیں، یہ ایک بڑا سوال ہے کہ ان کے والد کی بطور مرکزی وزیر داخلہ کی مدت جموں و کشمیر کو پاکستان آئی ایس آئی کے زیر اہتمام عسکریت پسندوں کے حوالے کیوں کیا گیا۔