پٹن ڈگری کالیج کا پرنسپل ایس پی کالیج میں گرفتار

سرینگر///
جموں کشمیر کے انسداد بدعنوانی بیورو(اے سی بی) نے منگل کی سہ پہر گرمائی دارالحکومت سری نگر میں محکمہ اعلیٰ تعلیم کے ایک پرنسپل کو رشوت لیتے ہوئے گرفتار کیا۔
ذرائع نے بتایا کہ ایک پروفیسر طارق عشائی جو جی ڈی سی پٹن کے پرنسپل ہیں، کو سری نگر کے ایس پی کالج میں۶۰ہزار روپے کی رشوت لیتے ہوئے رنگے ہاتھوں گرفتار کیا گیا۔
ان کا کہنا تھا کہ شکایت موصول ہونے پر پولیس اسٹیشن اے سی بی شمالی کشمیر میں سیکشن ۷ پریوینشن آف کرپشن ایکٹ ۱۹۸۸ کے تحت ایف آئی آر درج کی گئی اور تحقیقات کا آغاز کیا گیا۔
اس کے مطابق ٹریپ ٹیم تشکیل دی گئی۔ ٹریپ ٹیم نے کامیاب جال بچھا کر طارق عشائی کو آزاد گواہوں کی موجودگی میں ۶۰ہزار روپے رشوت لیتے ہوئے رنگے ہاتھوں گرفتار کر لیا۔
اہلکار کو سری نگر کے ایک پولیس اسٹیشن لے جایا گیا اور معاملے کی مزید تفتیش جاری ہے۔
ادھر بیورو نے منگل کی سہ پہر وسطی کشمیر کے بڈگام ضلع میں پی ڈی ڈی کے ایک ملازم کو بھی رشوت لیتے ہوئے گرفتار کر لیا۔
جاوید احمد نجار، ایم آر ٹیکنیشن سوم‘ شیخ پورہ پی ڈی ڈی کو بڈگام میں۲۰۰۰ روپے رشوت لیتے ہوئے رنگے ہاتھوں گرفتار کیا گیا۔
ان کا کہنا تھا کہ شکایت موصول ہونے پر پولیس اسٹیشن اے سی بی سنٹرل کشمیر میں سیکشن ۷ پریوینشن آف کرپشن ایکٹ ۱۹۸۸ کے تحت ایف آئی آر درج کی گئی اور تحقیقات کا آغاز کیا گیا۔
اس کے مطابق ٹریپ ٹیم تشکیل دی گئی۔ ٹریپ ٹیم نے کامیاب جال بچھا کر جاوید احمد نجار کو آزاد گواہوں کی موجودگی میں ۲ہزار روپے رشوت لیتے ہوئے رنگے ہاتھوں گرفتار کر لیا۔ اہلکار کو سرینگر کے ایک پولیس اسٹیشن لے جایا گیا اور معاملے کی مزید تفتیش جاری ہے۔