صحافی بننے کیلئے صحافت میں ڈگری یا ڈپلومہ لازمی ہونا چاہئے

بھوپال//
پریس کونسل آف انڈیا (پی سی آئی) کی ذیلی کمیٹی کے ذریعہ منعقدہ میٹنگوں کے شرکاء نے کہا ہے کہ صحافت میں ڈگری یا ڈپلومہ صحافی بننے کیلئے لازمی قابلیت ہونا چاہیے۔
پینل نے منگل سے دو دن تک یہاں کے قریب مکھن لال چترویدی نیشنل یونیورسٹی آف جرنلزم اینڈ کمیونیکیشن کے کیمپس میں صحافت کے مختلف اسٹیک ہولڈرز اور ماہرین تعلیم سے ملاقات کی۔
پینل کے ایک رکن سینئر صحافی پرکاش دوبے نے کہا کہ سپریم کورٹ کی جانب سے حکومت کو کچھ ہدایات جاری کرنے کے بعد پی سی آئی نے پرنٹ میڈیا کے نمائندوں یا صحافیوں کے لیے ضروری اہلیت کے معاملے پر غور کرنے کیلئے ذیلی کمیٹی قائم کی۔
اس کمیٹی کی قیادت نیشنل کونسل آف ایجوکیشنل ریسرچ اینڈ ٹریننگ (این سی ای آر ٹی) کے سابق ڈائریکٹر جے ایس راجپوت کر رہے ہیں اور اس کے دیگر اراکین میں پرکاش دوبے، گروپ ایڈیٹر، روزنامہ بھاسکر؛ سمن گپتا، ایڈیٹر، جنم مورچہ، لکھنؤ اور شیام سنگھ پنوار چھوٹے اور درمیانے اخبارات کی نمائندگی کر رہے ہیں۔
دوبے نے کہا کہ اسٹیک ہولڈرز نے مشورہ دیا کہ صحافت میں ڈگری یا ڈپلومہ کو لازمی اہلیت کے طور پر تجویز کیا جانا چاہیے۔
مکھن لال چترویدی یونیورسٹی کے وائس چانسلر کے جی سریش نے کہا کہ جیسا کہ ڈاکٹروں اور انجینئروں کے معاملے میں ہوتا ہے، صحافی کیلئے صحافت کا کورس ضروری ہے۔
بدھ کو ملاقاتیں ختم ہونے کے بعد، سریش نے پی سی آئی پینل کے اراکین کے ساتھ مدھیہ پردیش کے وزیر اعلی شیوراج سنگھ چوہان سے ملاقات کی۔
چوہان نے یقین ظاہر کیا کہ بھوپال میں ذیلی کمیٹی کی طرف سے موصول ہونے والی تجاویز مددگار ثابت ہوں گی۔