نئی دہلی//
مرکزی وزیر مملکت داخلہ‘نتیانند رائے نے بدھ کو کہا سی آر پی ایف جموں و کشمیر کے راجوری ضلع میں ولیج ڈیفنس گروپس (وی ڈی جیز) کے اہلکاروں کو دہشت گردانہ حملوں کے خلاف اپنے دفاع کیلئے ہتھیاروں کی تربیت دے رہا ہے اور ان میں سے۹۴۸ کو گزشتہ ماہ تربیت دی گئی ہے۔
یہ اقدام ضلع میں دہشت گردوں کے دو حملوں کے بعد کیا گیا، جو پاکستان کے ساتھ سرحد کا حصہ ہے اور دہشت گردوں کیلئے دراندازی کا ایک جانا جاتا راستہ ہے۔
رائے نے بی جے پی ممبر سشیل کمار مودی کے ایک سوال کے تحریری جواب میں کہا ’’سی آر پی ایف نے ۶ جنوری ۲۰۲۳ سے ۲۵ جنوری ۲۰۲۳ تک ضلع پولیس راجوری کے ساتھ مل کر۹۴۸ وی ڈی جی ممبروں کو ضروری تربیت دی ہے‘‘۔
وزیر نے کہا کہ اس وقت وی ڈی جیز کی منظور شدہ تعداد ۴۹۸۵ ہے جس میں سے۴۱۵۳ وی ڈی جی تشکیل دی گئی ہیں اور وزارت داخلہ نے گزشتہ سال فیصلہ کیا تھا کہ ہر وی ڈی جی میں۱۵ سے زیادہ ممبران نہیں ہوں گے۔
وہ لوگ جو ’زیادہ پر خطر علاقوں‘ میں وی ڈی جیز کی سربراہی کریں گے یا ان کو مربوط کریں گے، انہیں ۴۵۰۰ روپے ماہانہ ادا کیے جائیں گے اور وہ شخص جو رضاکارانہ بنیادوں پر وی ڈی جیز کے ممبر ہوں گے انہیں ۴۰۰۰ روپے ماہانہ کی یکساں شرح ادا کی جائے گی۔
وی ڈی جیز مندرجہ ذیل زمروں پر مشتمل ہوں گے: وہ لوگ جن کے پاس ایک درست اسلحہ لائسنس ہے اور جن کو جموں و کشمیر پولیس نے ہتھیار فراہم کیے ہیں، جن کا تعین ضلع مجسٹریٹ یا متعلقہ پولیس کے سینئر سپرنٹنڈنٹ نے رضاکاروں کی اسناد کو مدنظر رکھتے ہوئے کیا ہے۔
رائے نے کہا، گاؤں کی آبادی، اس کا محل وقوع اور حفاظتی تقاضے، ایسے افراد جن کے پاس جائز لائسنس اور ہتھیار ہیں یا وہ خود ہتھیار خریدنے کے خواہشمند ہیں۔