سرینگر/
شمالی کشمیر کے سنگرام پورہ بٹہ پورہ سوپور علاقے میں ایک ۱۶سالہ نوجوان نے مبینہ طور خود کشی کرکے اپنا کام تمام کیا۔
ذرائع نے بتایا کہ سوپور کے سنگرام پورہ بٹہ پورہ علاقے میں جمعے کے روز سولہ سالہ نوجوان نے اپنے ہی مکان کے اندر اپنے آپ کو لٹکا کر اپنی زندگی تمام کی۔انہوں نے بتایا کہ گھر والوں نے جب جواں سال نوجوان کو اپنے کمرے میں لٹکتے دیکھا تو انہوں نے فوری طورپر اس کو سب ضلع ہسپتال منتقل کیا لیکن وہاں ڈاکٹروں نے نوجوان کو مردہ قرار دیا۔
دریں اثنا پولیس ذرائع نے واقعے کی تصدیق کرتے ہوئے کہا اس سلسلے میں ایک کیس درج کرکے تحقیقات شروع کی گئی ہیں۔
بتادیں کہ ۴جنوری کو ڈانگر پورہ سوپور علاقے میں بھی ایک نوجوان نے پھانسی پر لٹکا کر اپنی زندگی کاخاتمہ کیا تھا۔شمالی کشمیر کے ضلع بارہ مولہ میں یکم جنوری سے خود کشیوں کے واقعات میں غیر معمولی اضافہ دیکھنے کو ملا ہے جس وجہ سے لوگوں میں تشویش کی لہر دوڑ گئی ہے۔