جموں//
مرکزی وزیر داخلہ امیت شاہ نے جمعہ کو راجوری ضلع میں یکم جنوری کو ہوئے عسکریت پسندوں کے حملے کے بعد جموں پہنچنے کے بعد حکام کے ساتھ ایک اعلیٰ سطحی میٹنگ کی صدارت کی۔
سرکاری ذرائع نے بتایا کہ امیت شاہ آج دوپہر جموں پہنچے، جہاں ان کا استقبال ایل جی منوج سنہا نے کیا۔
شاہ نے یکم جنوری کو عسکریت پسندوں کے حملے میں ہلاک ہونے والوں کے اہل خانہ سے ملاقات کیلئے راجوری جانا تھا، تاہم، خراب موسم کی وجہ سے ان کے ہیلی کاپٹر کو ایئر ٹریفک کنٹرول (اے ٹی سی ) کی طرف سے آگے کے سفر کے لیے کلیئرنس نہیں دی گئی۔
ایک اہلکار نے بتایا کہ شاہ نے بعد میں راج بھون جموں میں راجوری حملے کے تناظر میں سیکورٹی صورتحال کا جائزہ لینے کے لیے ایک اعلیٰ سطحی میٹنگ کی۔انہوں نے کہا کہ ایل جی منوج، سینئر پولیس اور سول حکام اور تمام سیکورٹی اور انٹیلی جنس ایجنسیوں کے سربراہان نے میٹنگ میں شرکت کی۔
شاہ نے حملے میں ہلاک ہونے والوں کے اہل خانہ سے بھی فون پر بات کی اور ہر ممکن مدد کی یقین دہانی کرائی۔
راجوری ضلع کے ڈانگری گاؤں میں یکم جنوری کو عسکریت پسندوں کے رہائشی مکانات پر دھاوا بولنے کے بعد کم از کم سات شہری ہلاک ہو گئے۔