چرار شریف میں’ تہری‘ کھانے کے بعد ۳۹؍افراد بیمار‘۱۸سرینگر منتقل

سرینگر//
وسطی ضلع بڈگام کے زگی پورہ چرار شریف علاقے میں جمعے کے روز تہری کھانے کے بعد۳۹؍افراد اچانک بیمار پڑ گئے اور اُنہیں سب ضلع ہسپتال منتقل کیا گیا جہاں سے۱۸؍افراد کو سری نگر ریفر کیا گیا ۔
یو این آئی اردو کے نامہ نگار نے بتایا کہ زگی پورہ چرار شریف میں اُس وقت سنسنی اور خوف ودہشت کا ماحول پھیل گیا جب تہری کھانے کے بعد۳۹؍افراد بیمار پڑ گئے اور اُنہیں فوری طورپر سب ضلع ہسپتال چرار شریف منتقل کیا گیا۔
انہوں نے بتایا کہ ابتدائی علاج ومعالجہ کے بعد ۱۵بچوں سمیت ۱۸کو سری نگر ریفر کیا گیا۔
سب ضلع ہسپتال چرار شریف میں تعینات ایک ڈاکٹر نے یو این آئی اردو کو بتایا کہ زگی پورہ چرار شریف سے قریباً ۳۹؍افراد اچانک بیمار پڑ گئے ۔انہوں نے بتایا کہ تہری کھانے کے بعد اچانک ۳۹؍افراد دست، قے اور بخار میں مبتلا ہو ئے اور اُن پر گشی طاری ہوئی ۔
اُن کے مطابق ۱۸؍افراد کو مزید علاج ومعالجہ کی خاطر سری نگر منتقل کیا گیا جن میں سے ۱۵بچوں کو سونہ وار اور ۳کو صدر ہسپتال سری نگر پہنچایا گیا ہے ۔
بلاک میڈیکل آفیسر چرار شریف ڈاکٹر تصور نے یو این آئی اردو کوتفصیلات فراہم کرتے ہوئے بتایا کہ زگی پورہ چرار شریف سے ۳۹؍افراد کو ہسپتال لایا گیا ۔انہوں نے کہاکہ ۱۵بچوں کو سری نگر کے بچہ ہسپتال منتقل کیا گیا جبکہ ۳صدر ہسپتال میں بھرتی کئے گئے ۔
دریں اثنا زگی پورہ چرار شریف میں تہری کھانے کے بعد ۳۹؍افراد کوہسپتال منتقل کرنے کی خبر پھیلتے ہی علاقے میں خوف و دہشت کا ماحول پھیل گیا اور لوگ اپنے بچوں کی خیر و عافیت دریافت کرنے کی خاطر ہسپتال پہنچے ۔