جنگجوؤں سے ’روابط ‘کے الزام میں ۵ سرکاری ملازمین برطرف

سرینگر/۳۰ مارچ
جموں کشمیر حکومت نے جنگجوؤں کے ساتھ مبینہ روابط کے الزام میں دو پولیس کانسٹیبلوں سمیت اپنے پانچ سرکاری ملازمین کو برطرف کردیا ہے۔
ذرائع کے مطابق برطرف کیے گئے ملازمین کی شناخت پلوامہ سے تعلق رکھنے والے پولیس کانسٹیبل توصیف احمد میر، سری نگر کے کمپیوٹر آپریٹر غلام حسن پرے، جنوبی کشمیر کے پلوامہ کے اونتی پورہ کے استاد ارشد احمد داس، بارہمولہ کے پولیس کانسٹیبل شاہد حسین راتھر اور کپواڑہ سے محکمہ صحت کے ایک نرسنگ آرڈرلی شرافت احمد خان کے طور کی گئی ہے۔
خیال کیا جاتا ہے کہ ملازمین کو’ریاست کی سلامتی کے مفاد میں‘ آئین ہند کے حال ہی میں نافذ کردہ آرٹیکل ۳۱۱ کے تحت برطرف کیا گیا ہے۔
قابل ذکر بات یہ ہے کہ جے اینڈ کے حکومت نے اپریل میں ایک خصوصی ٹاسک فورس (ایس ٹی ایف) تشکیل دی تھی تاکہ ایسے ملازمین کے ناموں کی سفارش کی جائے جو سیکورٹی کے لیے خطرہ بننے والی سرگرمیوں میں ملوث ہیں۔