سرینگر//
ڈوڈہ کشتواڑ شاہراہ پر شبنوتھ پریم نگر کے مقام پر تین روز قبل سڑک حادثے کے دوران گاڑی سمیت چناب میں غرق آب ہو ئے تین نوجوانوں کی تلاش تیسرے روز بھی جاری رہی۔
لاشوں کی بازیابی کیلئے اب فوج کے پیرا کمانڈوز کی خدمات حاصل کی گئیں تاہم ابھی تک کوئی سراغ نہیں ملا ہے۔
تین روز قبل پریم نگر کے قریب پیش آئے سڑک حادثے میں ایک کار میںسوار چار نوجوان دریا چناب میں ڈوب گئے لاپتہ نوجوانوں کی شناخت روہن منگوترا ولد سادھو رام ساکنہ نیاڈنگری، آدت کوتوال ولد راکیش کمار ساکن پریوٹ، سرجیت سنگھ ولد دھرم سنگھ ساکنہ جودھ پور اور وشال چندیل ولد جگدیش شیوا سوہندا کے طور پر ہوئی ہے جن میں سے صرف ایک لاش برآ مد کی گئی ہے۔
حادثہ ہوتے ہی لاپتہ نوجوانوں کا پتہ لگانے کیلئے بچائوآپریشن شروع کیا گیا تاہم دیر گئے امدادی کام روک دیا گیا تھا اور بد ھ کی صبح دوبارہ شروع کیا گیا جس دوران کشتیوں اور دیگر آلات کو کام پر لگا دیا ہے اور لاپتہ افراد کا پتہ لگانے کی تمام کوششیں کی جا رہی ہیں ۔
اس دوران ایس ڈی آر ایف اور ماہر غوطہ خوروں کو کام پر لگادیا گیا ہے۔ نمائندے کے مطابق لاپتہ ہو ئے افراد کے رشتہ داروں کے ساتھ ساتھ مقامی لوگوں کی ایک بڑی تعداد جائے واردات پر موجود تھی اور وہ ان پرماتم کررہے تھے۔