تو …توصاحب اپنی پارٹی کے بخاری صاحب … الطاف بخاری صاحب کاکہنا ہے کہ وہ لوگوں سے جھوٹ بولیں گے اور نہ انہیں بے وقوف بنائیں گے … یعنی دوسرے الفاظ میں ان جناب کاکہنا ہے کہ سیاستدان ‘ کشمیر کے لوگوں سے جھوٹ بھی بولتے آئے ہیں اور… اور انہیں بے وقوف بھی بناتے آئے ہیں… اور ایک اپنے بخاری صاحب ہیں جن کاکہنا ہے کہ وہ ایسا نہیں کریں گے ‘ لوگوں کو بے وقوف نہیں بنائیں گے … لیکن کیا واقعی ایسا ہے؟ یا پھر یہ کہہ کر ہی بخاری صاحب لوگوں کو بے وقوف بنا رہے ہیں… سچ تو یہ ہے کہ ان کا یہ کہنا ہی لوگوں کو بے وقوف بنانے کے مترادف ہے۔خیر! یقینا کشمیر کے سیاستدان لوگوں کو بے وقوف بنا تے آئے ہیں… لیکن … لیکن اب نہیں ‘ کہ اب لوگوں … کشمیر کے لوگوں کو بے وقوف نہیں بنایا جا سکتا ہے… ایسا نہیں ہے کہ ہم … ہم لوگوں میں زیادہ عقل آگئی ہے یا ہم سیاسی طور پر مزید باشعور ہو گئے ہیں… نہیں ایسا نہیں ہے‘ ہم جیسے تھے ویسے ہی ہیں… بلکہ مسئلہ یہ ہے کہ کشمیر کے سیاستدانوں کے پاس اب بچا ہی کیا ہے جس پر وہ لوگوں کو بے وقوف بنا سکتے ہیں… ان کے پاس بے وقوف بنانے کیلئے کچھ نہیں بچا ہے… این سی اٹانومی پر لوگوں کو بے وقوف بناتی تھی‘ اب وہ اٹانومی کے ’الف‘ کا بھی مطالبہ نہیں کر سکتی ہے… پی ڈی پی سیلف رول پر ‘ لیکن … لیکن اب لوگوں کو اس نعرے اور اس نعرے کو دینے والوں کی اصلیت سمجھ میں آگئی ہے‘ اس لئے پی ڈی پی چاہے تو بھی لوگوں کو سیلف رول پر بے وقوف نہیں بنا سکتی ہے… افسپا کی واپسی ‘ پر تو کوئی بات بھی نہیں کر سکتا ہے… فورسز کی تعداد میں کمی ‘ فوج کو واپس بارکوں میں بھیجنے جیسے مطالبے پر کوئی بے وقوف ہی لوگوں کو بے وقوف بنانے کا سوچ سکتا ہے… رہی بات یو ٹی کو واپس ریاست میں تبدیل کرنے کا مطالبہ تو… تو صاحب یقین کیجئے کہ اس نعرے پر بھی کوئی بھی سیاسی جماعت ‘ لوگوں کو بے وقوف نہیں بنا سکتی ہے اور… اور اس لئے نہیں بنا سکتی ہے کہ … کہ کشمیر کے لوگوں کی سمجھ میں یہ بات آگئی ہے اور… اور اللہ میاں کے فضل و کرم سے اچھی طرح آگئی ہے کہ … کہ کشمیر کی سیاسی جماعتیں اگر زمین آسمان ایک کردیں ‘دہلی کو ریاستی درجہ بحال نہیں کرنا ہو گا تو وہ نہیں کریگی اور… اور اگر اسے یہ درجہ بحال کرنا ہو گا تو… تو اسے اس کیلئے کشمیر کی کسی سیاسی جماعت یا سیاسی لیڈر کی سفارش کی ضرورت نہیں ہے… اور بالکل بھی نہیں ہے ۔اس لئے بخاری صاحب !آپ سچ میں لوگوں کو بے وقوف نہیں بنا سکتے ہیں… بالکل بھی نہیں بنا سکتے ہیں ۔ہے نا؟