مرکز کاجموں و کشمیر کو۲۶۵ڈی این بی میڈیکل نشستیں دینے کا اعلان

نئی دہلی//
وزیر اعظم کے ’سب کیلئے صحت‘ کے نظریے کے ساتھ ہم آہنگی میں، مرکزی حکومت نے جموں و کشمیر کے۲۰؍ اضلاع کے متعدد سرکاری اسپتالوں میں۲۶۵ ڈپلومیٹ آف نیشنل بورڈ (ڈی این بی) پوسٹ گریجویٹ میڈیکل سیٹیں دی ہیں۔
وزارت صحت کے ایک بیان میں کہا گیا ہے کہ اس قدم سے نہ صرف جموں و کشمیر کے لوگوں کو فائدہ پہنچے گا بلکہ وہاں کے ڈاکٹروں کو بھی اپنے علاقے میں تربیت حاصل کرنے کا موقع ملے گا۔
بیان میں کہا گیا ہے کہ اس گھریلو طبی افرادی قوت کو استعمال کرنے سے مرکز کے زیر انتظام علاقے میں صحت کی دیکھ بھال کی فراہمی کا ایک مؤثر نظام قائم ہوگا۔
جموں و کشمیر کے تقریباً ہر ضلع میں تربیت یافتہ ماہرین فراہم کرنے کے وڑن کے ساتھ، حکومت ہند نے اسے مشن موڈ میں ایک چیلنج کے طور پر لیا‘‘۔
بیان کے مطابق وزارت صحت نے میڈیکل سائنسز میں نیشنل بورڈ آف ایگزامینیشنز (این بی ای ایم ایس) کے ساتھ مل کر ایک اہم کردار ادا کیا اور اس بات کو یقینی بنایا کہ این بی ای ایم ایس کی متعدد پوسٹ گریجویٹ نشستیں جموں اور کشمیر کے مختلف سرکاری ہسپتالوں کو دی جائیں‘‘۔
نتیجے کے طور پر، فی الحال توسیعی منصوبے کے پہلے مرحلے میں۲۰؍ اضلاع میں۲۵۰ سے زیادہ پوسٹ گریجویٹ نشستیں موجود ہیں۔ دوسرے مرحلے میں دو مزید پی جی سیٹیں دی جائیں گی۔
پوسٹ گریجویٹ کی پچاس فیصد سیٹیں مقامی ان سروس ڈاکٹروں کیلئے مخصوص ہیں تاکہ انہیں پوسٹ گریجویٹ ٹریننگ کا موقع فراہم کیا جا سکے۔
جموں کشمیر کے لوگوں کو فائدہ پہنچے گا کیونکہ جدید معیاری صحت کی دیکھ بھال تقریباً تمام اضلاع میں زیادہ سستی اور قابل رسائی ہو جائے گی۔
بیان میں کہا گیا ہے کہ اس کے نتیجے میں بنیادی، ثانوی اور ٹرشیری صحت کی دیکھ بھال کے معیار میں مزید اضافہ ہوگا۔
بیان میں کہا گیا ہے کہ مرکزی حکومت نے یو ٹی میں امتحانی مراکز کی تعداد میں بھی اضافہ کیا ہے تاکہ یہ یقینی بنایا جا سکے کہ امیدواروں کو داخلہ امتحانات میں شرکت کے لیے دوسری ریاستوں کا سفر نہ کرنا پڑے۔