۵سے۷نومبر تک برف باری و بارشوں کا امکان

سرینگر//
محکمہ موسمیات نے اگلے چوبیس گھنٹوں کے دوران موسم خشک رہنے کی پیش گوئی کرتے ہوئے کہا کہ وادی کشمیر میں۵سے۷نومبر تک ہلکی سے درمیانی درجے کے برف و باراں کا امکان ہے ۔
موسمیات محکمے کے ایک ترجمان نے کہا کہ وادی میں اگلے چوبیس گھنٹوں کے دوران موسم مجموعی طور پر خشک رہنے کا امکان ہے ۔انہوں نے کہا کہ بعد میں موسم کروٹ بدل سکتا ہے جس کے نتیجے میں برف و باراں متوقع ہے ۔
ترجمان کا کہنا تھا کہ وادی میں پانچ سے سات نومبر کے دوران ہلکی سے درمیانی درجے کی برف باری یا بارشوں کا امکان ہے ۔انہوںنے ایک بار پھر دہرایا کہ وادی میں فی الوقت موسم بڑے پیمانے پر خراب ہونے کا کوئی امکان نہیں ہے ۔
موسمیات محکمے کے ترجمان نے تاہم کہا کہ برف باری اور درجہ حرارت میں کمی واقع ہونے سے کہیں کہیں خاص طور پر زوجیلا پاس، مغل روڈ اور سادھنہ ٹاپ پر ٹریفک کی نقل و حمل متاثر ہوسکتی ہے ۔
ادھر وادی میں سیاحتی مقام گلمرگ کو چھوڑ کر شبانہ درجہ حرارت معمول سے زیادہ درج ہوا ہے ۔
دارلحکومت سرینگر میں کم سے کم درجہ حرارت۶ء۵ڈگری سینٹی گریڈ ریکارڈ کیا گیا جو معمول سے۱ء۳ڈگری سینٹی گریڈ زیادہ ریکارڈ ہوا تھا۔
سیاحتی مقام گلمرگ میں کم سے کم درجہ حرارت منفی۰ء۰ڈگری سینٹی گریڈ ریکارڈ کیا گیا جو معمول سے۷ء۱ ڈگری سینٹی گریڈ کم ریکارڈ ہوا تھا۔ایک اور سیاحتی مقام پہلگام میں کم سے کم درجہ حرارت۵ء۱ڈگری سینٹی گریڈ ریکارڈ کیا گیا جو معمول سے۷ء۱ڈگری سینٹی گریڈ زیادہ ریکارڈ ہوا تھا۔
شمالی ضلع کپوارہ میں کم سے کم درجہ حرارت۱ء۵ ڈگری سینٹی گریڈ ریکارڈ کیا گیا جو معمول سے۲ء۳ڈگری سینٹی گریڈ زیادہ ریکارڈ ہوا تھا۔ قصبہ قاضی گنڈ میں کم سے کم درجہ حرارت۴ء۳ڈگری سینٹی گریڈ ریکارڈ کیا گیا جو معمول سے ۹ء۰ڈگری سینٹی گریڈ ریکارڈ ہوا تھا۔
دریں اثنا وادی میں جمعرات کو صبح سے ہی موسم خشک رہا اور ہلکی دھوپ بھی چھائی رہی جس سے لوگوں کو پارکوں اور دیگر جگہوں پر لطف اندوز ہوتے ہوئے دیکھا گیا۔