جموں کشمیر میں ترقی کی کمی کو پوراکیا جارہا ہے :سنہا

نئی دہلی//
لیفٹیننٹ گورنر منوج سنہا نے آج میواڑ یونیورسٹی کے چانسلر ڈاکٹر اشوک کمار گڈیا کی لکھی ہوئی ایک کتاب ’’میرے انوبھو اور اتہاس کے جھڑوکے سے کشمیر‘‘ کا اجرا کیا۔
اس موقع پر منعقدہ تقریب سے خطاب میں سنہا نے کہا کہ آزادی کے بعد سے جموں کشمیر میں رونما ہونے والے اہم تاریخی اور سیاسی واقعات کو سمجھنے کی ضرورت پر روشنی ڈالتے ہوئے، لیفٹیننٹ گورنر نے کہاکہ وزیر اعظم‘ نریندر مودی کی رہنمائی میں، ہم نے ترقی کی راہ میں حائل رکاوٹوں کو توڑنے کے لیے پرعزم کوششیں کی ہیں۔
لیفٹیننٹ گورنر نے کہا ’’مساوات، ترقی پسندی، سب کو بااختیار بنانا، اچھی حکمرانی، شفاف اور جوابدہ انتظامیہ، بہتر انفراسٹرکچر اور کنیکٹیویٹی، جدید اور سستی صحت کی دیکھ بھال اور تعلیمی خدمات، صنعتی ترقی، ایک مضبوط گراس روٹ ڈیموکریٹک سیٹ اپ اور گورننس کے ’عوام سب سے پہلے‘ کے اصول نے سات دہائیوں کا ترقی کی کمی کو پورا کیا ہے‘‘۔
سنہا نے کہا کہ معاشرے کے محروم طبقے کی بہتری کے لیے ہماری گہری اور مستقل عزم نے سماجی مساوات اور انصاف کے خواب کو حقیقت میں بدل دیا ہے۔ لیفٹیننٹ گورنر نے مزید کہا کہ پچھلے تین سالوں میں سماجی اور اقتصادی تبدیلی نے ترقی کے بے پناہ امکانات کو کھول دیا ہے۔