مہاراجہ ہری سنگھ کے یوم پیدائش پر تعطیل

جموں//
جموں کشمیر کے لیفٹیننٹ گورنر‘ منوج سنہا نے جمعہ کو کہا کہ مہاراجہ ہری سنگھ کے یوم پیدائش کو عام تعطیل کے طور پر منانے کا فیصلہ مقامی لوگوں کے جذبات کا احترام کرتے ہوئے لیا گیا ہے۔
لیفٹیننٹ گورنر نے کہا’’مقامی لوگوں کے جذبات کا احترام کرتے ہوئے، یہ فیصلہ آنجہانی مہاراجہ ہری سنگھ کے تعاون کو دیکھتے ہوئے لیا گیا ہے۔ مجھے امید ہے کہ چند دنوں میں سرکاری احکامات جاری کر دیے جائیں گے‘‘۔
حکام نے جمعرات کو بتایا کہ جموں کشمیر میں آنجہانی مہاراجہ ہری سنگھ کے یوم پیدائش پر عام تعطیل ہوگی۔ مہاراجہ ہری سنگھ ۲۳ ستمبر۱۸۹۵ کو پیدا ہوئے۔
یہ اعلان لیفٹیننٹ گورنر منوج سنہا نے راج بھون میں سرکردہ سیاسی رہنماؤں، یووا راجپوت سبھا کے اراکین اور سول سوسائٹی کے اراکین بشمول جموں و کشمیر ٹرانسپورٹ یونین کے سربراہ پر مشتمل ایک وفد سے ملاقات کے بعد کیا۔
وفد سے ملاقات کے بعد کہنا تھا’’حکومت نے مہاراجہ ہری سنگھ جی کے یوم پیدائش کو عام تعطیل کا اعلان کرنے کا فیصلہ کیا ہے۔ مہاراجہ ہری سنگھ ایک عظیم ماہر تعلیم، ترقی پسند مفکر، سماجی مصلح اور نظریات و نظریات کے بلند پایہ انسان تھے۔ عام تعطیل مہاراجہ ہری سنگھ جی کی شاندار وراثت کو خراج تحسین پیش کرنے کیلئے موزوں ہوگی۔‘‘