آزاد کا موجودہ وقت میں کانگریس کو چھوڑنا صحیح فیصلہ نہیں:فاروق عبداللہ

سرینگر//
جموںکشمیر نیشنل کانفرنس کے سرپرست اعلیٰ ڈاکٹر فاروق عبداللہ کا کہنا ہے کہ غلام نبی آزاد کانگریس کا ایک اہم ستون تھا ۔
ڈاکٹر فاروق نے کہاکہ مجھے کافی افسوس ہے کہ غلام نبی آزاد نے اتنا بڑا فیصلہ لیا ۔
ان باتوں کا اظہار موصوف نے سری نگر میں نامہ نگاروں سے بات چیت کے دوران کیا۔
نیشنل کانفرنس کے صدر نے کہاکہ غلام نبی آزاد نے ساری زندگی انڈین نیشنل کانگریس کو دی اور یہ کہ کالج کے دنوں سے وہ اس پارٹی کے ساتھ جڑے رہے ۔
فاروق کے مطابق غلام نبی آزاد کانگریس میں سب سے اونچے قدر کے لیڈر تھے اور اُن کا کانگریس کو خیر باد کہنا پارٹی کے لئے بہت بڑا جھٹکا ہے ۔
سابق ویر اعلیٰ کا مزید کہنا تھا کہ غلام نبی آزاد نے اندرا گاندھی کے وقت سے کانگریس میں کام کیا اور بڑے عہدوں پر وہ فائز رہے ۔اُنہوں نے مزید بتایا کہ غلام نبی آزاد کا کانگریس چھوڑنا اچھا فیصلہ نہیں کیونکہ کانگریس اس وقت مشکل دور سے گزر رہی ہے ۔
فاروق نے کہاکہ اگر کانگریس ملک میں مضبوط ہوتی اس دوران غلام نبی آزاد پارٹی کو خیر باد کہتے تو اس سے کوئی اثر نہیں پڑتا لیکن موجودہ حالات میں غلام نبی آزاد کا اتنا بڑا فیصلہ لینا کانگریس کیلئے نقصان دہ ثابت ہو سکتا ہے ۔
اس دوران نیشنل کانفرنس کے نائب صدر اور سابق وزیر اعلیٰ عمر عبداللہ نے سینئر سیاسی لیڈر غلام نبی آزاد کے استعفیٰ کو کانگریس کیلئے ایک زور دار دھچکا قرار دیتے ہوئے کہ کانگریس جیسی عظیم اور قدم پارٹی میں دھماکہ ہوتے ہوئے دیکھنے سے کافی افسوس ہو رہا ہے ۔
عمر نے ان باتوں کا اظہار جمعے کے روز اپنے ایک ٹویٹ میں کیا۔
سابق وزیر اعلیٰ نے اپنے ٹویٹ میں کہا’’ طویل عرصے سے افواہیں گردش میں تھیں تاہم یہ کانگریس کیلئے بڑا دھچکا ہے ‘‘۔ان کا ٹویٹ میں مزید کہنا تھا’’شاید حالیہ دنوں میں پارٹی سے کنارہ کشی کرنے والے سب سے سینئر لیڈر ہیں ان کا استعفیٰ نامہ پڑھ کر تکلیف ہوئی‘‘۔
عمر عبداللہ نے اپنے ٹویٹ میں مزید کہا کہ ملک کی سب سے عظیم اور پرانی پارٹی میں دھماکہ ہوتے ہوئے دیکھنے سے افسوس ہو رہا ہے ۔
قابل ذکر ہے کہ غلام نبی آزاد نے کانگریس کی بنیادی رکنیت سے مستعفی ہوئے ہیں۔