سرینگر/۲۱ مارچ (ندائے مشرق ویب ڈیسک)
بی بی سی کے مطابق چینی حکام نے تصدیق کی ہے کہ ملک کے گوانگشی صوبے میں چائنہ ایسٹرن ایئر لائنز کا مسافر طیارہ گِر کر تباہ ہوگیا ہے۔
چین کے سول ایوی ایشن کے ادارے (سی اے اے) کا کہنا ہے کہ اس طیارے پر ۱۲۳مسافر اور عملے کے نو افراد موجود تھے۔تاحال اس حادثے کی وجہ اور اموات یا زخمیوں کی تصدیق نہیں کی گئی ہے۔
ایم یو۵۷۳۵ نامی اس پرواز نے کونمینگ سے مقامی وقت ایک بج کر۱۱ منٹ پر اڑان بھری تھی اور اس نے تین بج کر پانچ منٹ پر گوانگزو پہنچنا تھا۔
سی اے اے کے مطابق امدادی کارروائیاں شروع کر دی گئی ہیں اور ریسکیو کے عملے کو تعینات کر دیا گیا ہے۔ حادثے کے بعد گوانگشی میں واقع پہاڑوں پر آگ لگنے کی اطلاعات موصول ہوئی ہیں۔
فلائٹ ٹریکنگ کرنے والی ویب سائٹس کا کہنا ہے کہ اس طیارے نے قریب ایک گھنٹے تک پرواز جاری رکھی تھی۔ فلائٹ ریڈار ۲۳ کی معلومات کے مطابق پرواز سے متعلق مقامی وقت دو بج کر۲۲ منٹ پر آخری ڈیٹا موصول ہوئی۔ اس وقت یہ طیارہ۳۲۲۵ فٹ کی بلندی پر تھا۔
اطلاعات کے تحت یہ طیارہ وازو شہر کی ٹینگ کاؤنٹی میں گِرا ہے۔ جنوبی صوبہ گوانگشی جنوب مشرق میں واقع بڑے شہر گوانگزو کے قریب واقع ہے۔
یہ خبر اپ ڈیٹ کی جا رہی ہے۔