اتر پردیش قانون ساز کونسل کے آگرہ ڈویژن ٹیچر انتخابی حلقے کے تین پولنگ مراکز پر 26 اکتوبر کو دوبارہ ووٹنگ

نئی دہلی، 24 اکتوبر (یو این آئی) الیکشن کمیشن نے اتر پردیش قانون ساز کونسل کے آگرہ ڈویژن ٹیچر انتخابی حلقے کے تین پولنگ مراکز پر 26 اکتوبر کو دوبارہ ووٹنگ کرانے کا حکم دیا ہے۔
کمیشن نے ریاست کے چیف الیکٹورل آفیسر (سی ای او) کو ہدایت دی ہے کہ جمعہ کو پولنگ مراکز نمبر 20، 21 اور 26 پر ہونے والی ووٹنگ میں بے ضابطگیوں کی شکایات کے بعد وہاں کی انتخابی کارروائی منسوخ کر دی گئی ہے۔
کمیشن کی جانب سے ہفتے کے روز ریاست کے سی ای او کو لکھے گئے خط میں ان پولنگ مراکز پر پیر کی صبح 8 بجے سے شام 4 بجے تک دوبارہ ووٹنگ کرانے کی ہدایت دی گئی ہے۔ کمیشن نے واضح کیا ہے کہ دوبارہ ووٹنگ کے عمل میں ایسے کسی افسر کو تعینات نہ کیا جائے جو بے ضابطگیوں میں ملوث رہا ہو۔
اتر پردیش کے سی ای او سے کہا گیا ہے کہ دوبارہ ووٹنگ کا عمل صحیح طریقے سے مکمل ہونے کے بعد اس انتخابی حلقے میں ووٹوں کی گنتی کے لیے کمیشن سے دوبارہ اجازت حاصل کریں۔
کمیشن نے اس کے علاوہ یہ ہدایت بھی دی ہے کہ آگرہ کے ڈویژنل کمشنر ووٹنگ میں بے ضابطگیوں کے ذمہ دار پولیس اور انتظامی افسران سمیت دیگر افراد کی شناخت کرکے اتوار تک اپنی تحقیقاتی رپورٹ کمیشن کو بھیجیں۔