بڈگام میں غیر مقامی مزدور سے سیل فون چھیننے کے الزام میں دو گرفتار

سرینگر//
وسطی کشمیر کے ضلع بڈگام میں پولیس نے ایک غیر مقامی مزدور سے سیل فون چھیننے والے دو افراد کو گرفتار کیا ہے ۔
پولیس نے اس دکاندار کو بھی گرفتار کیا ہے جس نے یہ سیل فون خریدا تھا۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ محمد دلشاد ولد محمد نعیم ساکن شمرہ بہار جو نصراللہ پورہ بڈگام میں میسن کی حیثیت سے کام کر رہا ہے ، نے پولیس اسٹینش بڈگام میں ایک شکایت درج کی کہ دو نامعلوم افراد نے اس کا سیل فون چھین لیا۔
ترجمان نے کہا کہ شکایت پر مذکورہ پولیس اسٹیشن میں ایک ایف آئی آر درج کی گئی اور اس سلسلے میں تحقیقات شروع کی گئی۔
بیان میں کہا گیا کہ پولیس کی ایک ٹیم نے تحقیقاتی افسر پی ایس آئی عادل احمد کی قیادت میں چوبیس گھنٹوں میں ہی اس کیس کو حل کرکے ملزمان شبیر احمد ڈار عرف شب چیلہ ولد علی محمد ڈار اور عبدالریشد راتھر عرف ریش متو ولد محمد سبحان راتھر ساکنان نصراللہ پورہ کو گرفتار کیا۔
پولیس بیان کے مطابق گرفتار شدگان کے انکشاف پر آٹھ سیل فون بر آمد کئے گئے ۔
پولیس ترجمان نے بیان میں کہا کہ پوچھ گچھ کے دورن گرفتار شدگان نے انکشاف کیا کہ انہوں نے چوری شدہ موبائل فون ارشاد احمد ڈار ولد گلزار احمد ڈار ساکن پٹھان پورہ نصراللہ پورہ نامی دکاندار کو فروخت کئے جس کو اس کیس کے سلسلے میں گرفتار کیا گیا۔