سرینگر؍۱۱ ستمبر
مرکزی وزیر مملکت برائے اطلاعات و نشریات ایل مروگن نے فلم سازوں کو جموں و کشمیر واپس آنے کی دعوت دیتے ہوئے کہا ہے کہ خطہ کھلے دل سے ان کا استقبال کرنے کے ساتھ ساتھ تیار بنیادی ڈھانچہ اور بے مثال قدرتی حسن بھی رکھتا ہے۔
جمعرات کو یہاں پہلے انٹرنیشنل فلم فیسٹیول آف جموں و کشمیر کی اختتامی تقریب سے خطاب کرتے ہوئے مرگن نے کہا کہ جموں و کشمیر ایک مرتبہ پھر فلم سازوں کے لیے ایک اہم اور ترجیحی منزل بننے کی پوری صلاحیت رکھتا ہے۔
مروگن نے فلم سازوں کو براہ راست دعوت دیتے ہوئے کہا کہ جموں و کشمیر بڑے فلمی منصوبوں کی میزبانی کے لیے پوری طرح تیار اور پُرجوش ہے۔انہوں نے کہا، ’’جموں و کشمیر آپ کا کھلے دل سے استقبال کرتا ہے، یہاں تیار بنیادی ڈھانچہ موجود ہے اور بے مثال قدرتی حسن بھی۔‘‘
مرکزی وزیر نے کہا کہ فلم فیسٹیول نے اس تبدیلی کو نمایاں کیا ہے جس کے تحت اب جموں و کشمیر صرف بیرونی فلم سازوں کے لیے خوبصورت فلم بندی کی جگہ نہیں رہا، بلکہ خطے کے نوجوان بھی تخلیقی عمل میں آگے بڑھتے ہوئے کیمرے کے پیچھے اپنی جگہ بنا رہے ہیں۔
مروگن نے کہا، ’’یہ فیسٹیول جموں و کشمیر کے متحرک نوجوانوں کا ہے۔ برسوں تک دنیا یہاں آتی رہی اور اپنے کیمروں کے ذریعے ہماری وادیوں کو محفوظ کرتی رہی، لیکن آج ہمارے نوجوان خود کیمرے کے پیچھے آنے کے لیے آگے بڑھ رہے ہیں۔‘‘
مرکزی وزیر کے مطابق اسکرپٹ رائٹنگ ورکشاپس سے لے کر ڈیجیٹل اسٹوری ٹیلنگ تک جموں و کشمیر کے نوجوان اپنی صلاحیتوں کا مظاہرہ کر رہے ہیں اور یہ ثابت کر رہے ہیں کہ تخیل کی کوئی سرحد نہیں ہوتی۔انہوں نے کہا کہ جموں و کشمیر میں ایک مرتبہ پھر بھارت اور دنیا بھر کے فلم سازوں کی پسندیدہ منزل بننے کی تمام صلاحیتیں موجود ہیں۔
مروگن نے نوجوانوں کو فلمی صنعت سے متعلق عملی اور جدید مہارتوں سے آراستہ کرنے کی ضرورت پر زور دیتے ہوئے کہا کہ توجہ صلاحیتوں کو فروغ دینے، صنعت سے روابط مضبوط کرنے، معیاری بنیادی ڈھانچہ فراہم کرنے اور نوجوانوں کے لیے نئے مواقع پیدا کرنے پر مرکوز ہونی چاہیے۔
مرکزی وزیر نے جموں و کشمیر کے نوجوانوں کی فلم سازی، اسکرپٹ رائٹنگ اور ڈیجیٹل کہانی بیان کرنے کے شعبوں میں بڑھتی ہوئی شرکت کا خیرمقدم کیا اور امید ظاہر کی کہ فلم فیسٹیول مقامی صلاحیتوں کے لیے نئے مواقع پیدا کرنے کے ساتھ ساتھ انہیں وسیع تر تخلیقی صنعت سے جوڑنے میں بھی معاون ثابت ہوگا۔
۔۔۔۔۔۔
(ویب ڈیسک)
