ہیرو موٹرز شیئر بازار میں درج فہرست ہوگی، 16 ستمبر کو کھلے گا آئی پی او

نئی دہلی، 10 ستمبر (یو این آئی) گاڑیوں کے پرزہ جات بنانے والی کمپنی ہیرو موٹرز لمیٹڈ کا انیشیل پبلک آفرنگ (آئی پی او) 16 ستمبر کو کھلے گا اور 18 ستمبر کو بند ہوگا۔
کمپنی نے جمعرات کو بتایا کہ 10 روپے کی درج شدہ قیمت والے ایکویٹی شیئر کے لیے قیمت کا دائرہ 79 روپے سے 84 روپے فی شیئر طے کیا گیا ہے۔ سرمایہ کار کم از کم 178 ایکویٹی شیئرز کے لیے بولی لگا سکتے ہیں اور اس کے بعد 178 ایکویٹی شیئرز کے ملٹیپل میں بولی لگا سکتے ہیں۔
آئی پی او کے تحت 600 کروڑ روپے تک کے نئے شیئر جاری کیے جائیں گے۔ پروموٹر او پی منجال ہولڈنگس اور ہیرو سائیکلس لمیٹڈ اپنے حصص میں سے 400 کروڑ روپے تک کے ایکویٹی شیئر آفر فار سیل (او ایف ایس) کے تحت فروخت کریں گے۔ اس طرح آئی پی او سے کمپنی کو 1000 کروڑ روپے تک کی آمدنی کی توقع ہے۔
ہیرو موٹرز کی پریس ریلیز میں بتایا گیا ہے کہ فریش ایشو سے ملنے والی 190 کروڑ روپے کی رقم کا استعمال کمپنی کی جانب سے لیے گئے کچھ بقایا قرض کے پورے یا جزوی ادائیگی/پیشگی ادائیگی کے لیے کیا جائے گا۔ دیگر 200 کروڑ روپے کا استعمال کمپنی کے کیپیٹل خرچ کے لیے کیا جائے گا۔ اس میں اتر پردیش کے گوتم بدھ نگر واقع پلانٹ کی صلاحیت بڑھانے کے لیے ضروری مشینری کی خریداری، اب تک غیر اعلانیہ حصول اور دیگر اسٹریٹجک پہلوؤں کے ذریعے توسیع، اور عام کام کاج شامل ہیں۔
کمپنی ملک کی سرکردہ گاڑیوں کی ٹیکنالوجی کمپنیوں میں سے ایک ہے۔ وہ امریکہ، یورپ، ہندوستان اور آسیان ممالک میں گاڑیاں بنانے والی کمپنیوں کے لیے اعلیٰ ٹیکنالوجی والے پاور ٹرین سولیوشن تیار کرتی ہے۔ وہ روایتی ایندھن والی گاڑیوں کے ساتھ الیکٹرک گاڑیوں کے لیے بھی پاور ٹرین بناتی ہے۔