سرینگر/۹ستمبر
جموں و کشمیر پولیس نے شمالی کشمیر کے ہندواڑہ علاقے میں کالعدم جنگجو تنظیم حزب المجاہدین (ایچ ایم) سے وابستہ ایک دہشت گرد ماڈیول کا پردہ فاش کرنے اور اسے چلانے والے ایک مبینہ سابق جنگجو کو گرفتار کرنے کا دعویٰ کیا ہے، جو ہائبرڈ موڈ میں سرگرم تھا۔
ایک بیان میں پولیس کے ترجمان نے بتایا کہ ہندواڑہ پولیس کو ایک سابق جنگجو کی سرگرمیوں سے متعلق قابلِ اعتماد اطلاع ملی تھی، جو ہندواڑہ-کپواڑہ علاقے میں کالعدم تنظیم حزب المجاہدین کے ایک ماڈیول کے حصے کے طور پر ہائبرڈ دہشت گرد کی حیثیت سے سرگرم تھا۔
بیان کے مطابق، ’’اطلاع ملتے ہی ہندواڑہ پولیس نے۲۱ راشٹریہ رائفلز اور۹۲ویں بٹالین سی آر پی ایف کے ساتھ مل کر ہندواڑہ قصبے میں نشاندہی کردہ مقام پر مشترکہ کارروائی شروع کی۔‘‘
پولیس نے بتایا کہ سکیورٹی کے تمام ضروری اقدامات کے بعد ملزم کو گرفتار کرلیا گیا۔ اس کی شناخت منظور احمد بھٹ ولد محمد سلطان بھٹ، ساکن کروہمورا ہندواڑہ کے طور پر ہوئی ہے۔
پولیس کے مطابق گرفتاری کے وقت ملزم کے قبضے سے چین ساختہ ایک پستول، دو میگزین اور پستول کے۱۶ راؤنڈز برآمد کیے گئے۔
پولیس بیان میں مزید بتایا گیا ہے کہ گرفتار شخص سابق جنگجو ہے اور اسے ماضی میں پولیس نے دو مقدمات میں گرفتار کیا تھا۔
پولیس نے کہا کہ اس سلسلے میں پولیس اسٹیشن ہندواڑہ میں ایف آئی آر نمبر۲۳۲ متعلقہ دفعات کے تحت درج کرلی گئی ہے، جبکہ ماڈیول کی سرگرمیوں، اس کے نیٹ ورک اور دیگر وابستہ عناصر کے بارے میں مزید معلومات حاصل کرنے کے لیے تحقیقات جاری ہے۔
۔۔۔۔۔۔۔ایجنسیاں
