محبوبہ‘ تنویر صادق اور طارق حمید قرہ نے طلبہ کی جدوجہد کو سراہا
ایجنسیاں
سرینگر؍۲۵ جولائی
جموں و کشمیر کی مختلف سیاسی جماعتوں نے مرکزی وزیر تعلیم دھرمیندر پردھان کے استعفے کا خیر مقدم کرتے ہوئے اسے ملک کے نوجوانوں اور طلبہ کی جمہوری جدوجہد کی کامیابی قرار دیا ہے۔
دھرمیندر پردھان نے ہفتہ کے روز اپنے عہدے سے استعفیٰ دیا۔ امتحانی نظام میں بے ضابطگیوں اور این ای ای ٹی پیپر لیک معاملے پر ان کے استعفے کا مطالبہ گزشتہ۳۵ روز سے جاری تھا، جس کے نتیجے میں کاکروچ جنتا پارٹی (سی جے پی) کی قیادت میں ہزاروں طلبہ نے غیر معمولی احتجاج کیا۔
سابق وزیر اعلیٰ جموں و کشمیر اور پیپلز ڈیموکریٹک پارٹی (پی ڈی پی) کی صدر محبوبہ مفتی نے کہا کہ پردھان کا استعفیٰ ان نوجوانوں کی کامیابی ہے جنہوں نے بھوک اور پیاس برداشت کی مگر احتجاج کے دوران تشدد کا راستہ اختیار نہیں کیا۔
صحافیوں سے گفتگو کرتے ہوئے انہوں نے کہا’’میرے خیال میں یہ بھارت کے نوجوانوں کی فتح ہے۔ اتنے دنوں تک بھوکے پیاسے رہنے کے باوجود انہوں نے کسی بھی قسم کا تشدد نہیں کیا‘‘۔
محبوبہ نے کہا کہ مہاتما گاندھی کے بھارت کا تصور ایک بار پھر اپنی جگہ بنا رہا ہے۔انہوں نے کہا’’جو نوجوان تقسیم، ہندو مسلم سیاست اور فرقہ وارانہ پولرائزیشن پر یقین نہیں رکھتے، انہوں نے بھارت کے اصل تصور کو زندہ رکھا ہے۔ مجھے خوشی ہے کہ ہمیں، جنہیں اکثر ملک دشمن یا علیحدگی پسند کہا جاتا ہے، وہاں محبت اور عزت ملی۔ اس سے امید پیدا ہوئی ہے کہ گاندھی کا بھارت اب بھی زندہ ہے اور ملک کے نوجوان ہی اس کا مستقبل ہیں‘‘۔انہوں نے کہا کہ دھرمیندر پردھان کا استعفیٰ اس سمت میں پہلا قدم ہے کہ بھارت کی حقیقی تصویر کیا ہونی چاہیے۔
ایک سوال کے جواب میں پی ڈی پی صدر نے کہا کہ یہ حکومت کے لیے واضح پیغام ہے ’’فرقہ واریت اور ہندو مسلم سیاست ایک حد سے زیادہ کامیاب نہیں ہو سکتی‘‘۔
جموں و کشمیر کے حقوق سے متعلق سوال پر انہوں نے کہا کہ ریاست کے عوام کو صرف بنیادی حقوق ہی نہیں بلکہ اس سے بھی زیادہ ملنا چاہیے کیونکہ انہوں نے بہت کچھ کھویا ہے۔ انہوں نے کہا کہ احتجاج میں شریک جموں و کشمیر کے نوجوانوں نے ملک بھر کے طلبہ کا ساتھ دیا، اب ملک کے نوجوانوں کی ذمہ داری ہے کہ وہ جموں و کشمیر کے عوام کے مسائل کے لیے بھی آواز بلند کریں۔
نیشنل کانفرنس کے چیف ترجمان تنویر صادق نے کہا کہ یہ ان تمام طلبہ کی کامیابی ہے جنہوں نے اپنے حقوق کے لیے آواز بلند کی۔
صادق نے کہا’’یہ خوش آئند بات ہے کہ ملک کے طلبہ کی بات سنی گئی۔ یہ ہر اس طالب علم کی فتح ہے جس نے اپنے حقوق کے لیے آواز اٹھائی‘‘۔انہوں نے کہا کہ یہ ان تمام افراد کو خراج عقیدت بھی ہے جنہوں نے اس مسئلے پر اپنی جانوں کا نذرانہ پیش کیا۔
این سی ترجمان اعلیٰ نے مزید کہا کہ وہ تمام طلبہ کو سلام پیش کرتے ہیں جو ملک کے تعلیمی نظام میں بہتری چاہتے ہیں۔ انہوں نے زور دیا کہ مرکزی حکومت نوجوانوں کے خدشات کو سنجیدگی سے سمجھے اور ان کے مطالبات کو جلد از جلد پورا کرے۔ ان کے مطابق یہ احتجاج ایک فطری عوامی تحریک تھی جسے ہر طبقے کی حمایت حاصل رہی۔
ادھر جموں و کشمیر پردیش کانگریس کمیٹی کے صدر طارق حمید قرہ نے ملک کے نوجوانوں کو مبارکباد دیتے ہوئے کہا کہ آج کی پیش رفت سچائی، ثابت قدمی اور لاکھوں طلبہ و نوجوانوں کی متحدہ آواز کی کامیابی ہے۔انہوں نے اپنے بیان میں کہا’’میں ملک کے نوجوانوں کو ان کی پُرامن اور جمہوری جدوجہد پر مبارکباد پیش کرتا ہوں۔ آج کا دن سچائی، استقامت اور لاکھوں نوجوانوں کی اجتماعی آواز کی فتح کا دن ہے‘‘۔
قرہ نے راہل گاندھی کو بھی مبارکباد دیتے ہوئے انہیں ایسے دور میں جمہوریت کا علمبردار قرار دیا جب جمہوری اداروں اور اختلافِ رائے پر دباؤ بڑھا ہے۔انہوں نے کہا کہ راہل گاندھی مسلسل نوجوانوں کے ساتھ کھڑے رہے، ان کے مسائل کو بے خوفی سے اٹھایا اور ان کی آواز کو دبانے کی ہر کوشش کی مخالفت کی۔انہوں نے مزید کہا کہ مرکزی وزیر تعلیم کا استعفیٰ اس بات کا واضح اعتراف ہے کہ حکومت لاکھوں نوجوانوں کی جوابدہی اور انصاف کی آواز کو دبانے کی کوشش کے باوجود ناکام رہی اور’غرور پر سچائی کی فتح ہوئی ہے‘۔
کانگریسی لیڈرکے مطابق موجودہ حکومت کی عوام کے سامنے یہ دوسری بڑی پسپائی ہے۔ انہوں نے کہا کہ پہلی مرتبہ حکومت کو تاریخی کسان تحریک کے بعد تین زرعی قوانین واپس لینے پڑے تھے، جبکہ اب اسے نوجوانوں کی متحدہ آواز کے سامنے بھی جھکنا پڑا ہے، جو اس بات کی عکاسی کرتا ہے کہ حکومت نے بارہا مشاورت کے بجائے محاذ آرائی کا راستہ اختیار کیا۔
قرہ نے کہا کہ کوئی بھی حکومت خواہ کتنی ہی طاقتور کیوں نہ ہو، عوام کی جمہوری خواہشات کو زیادہ دیر تک دبا نہیں سکتی اور ملک کے نوجوانوں نے ثابت کر دیا ہے کہ پُرامن، منظم اور ثابت قدم جمہوری جدوجہد ہی جمہوریت کی سب سے بڑی طاقت ہے۔
۔۔۔۔۔۔
