سرینگر؍۲۱ جولائی
جموں و کشمیر حکومت نے منگل کو جاری گرمائی تعطیلات میں۲۶ جولائی تک توسیع کرتے ہوئے واضح کیا ہے کہ یہ فیصلہ جموں و کشمیر کے تمام سرکاری اور تسلیم شدہ نجی اسکولوں پر یکساں طور پر لاگو ہوگا، جن میں جموں ڈویژن کے سمر زون کے اسکول بھی شامل ہیں۔
اس وضاحت کا اعلان وزیر تعلیم سکینہ ایتو نے سوشل میڈیا پلیٹ فارم ایکس پر ایک نئی پوسٹ کے ذریعے کیا۔ اس سے قبل جاری کیے گئے حکم نامے میں صرف کشمیر ڈویژن اور جموں ڈویژن کے سرمائی زون کے اسکولوں کی تعطیلات میں توسیع کا ذکر کیا گیا تھا۔
تازہ وضاحت کے بعد اب جموں و کشمیر کے تمام سرکاری اور تسلیم شدہ نجی اسکول۲۶ جولائی تک بند رہیں گے، جبکہ تعلیمی سرگرمیاں پیر‘۲۷ جولائی سے دوبارہ شروع ہوں گی۔
وزیر تعلیم نے کہا کہ موجودہ خراب موسمی حالات کا جائزہ لینے کے بعد یہ فیصلہ کیا گیا ہے اور حکومت کے لیے طلبہ، اساتذہ اور ان کے اہل خانہ کی سلامتی اور فلاح و بہبود اولین ترجیح ہے۔
سکینہ ایتو نے عوام سے اپیل کی کہ وہ موسم سے متعلق متعلقہ حکام کی جانب سے جاری کردہ تمام ہدایات اور حفاظتی مشوروں پر سختی سے عمل کریں، چوکس رہیں اور موجودہ خراب موسمی صورتحال کے دوران اپنی اور اپنے اہل خانہ کی سلامتی کو ترجیح دیں۔ انہوں نے سب کے لیے صحت و سلامتی کی نیک تمناؤں کا بھی اظہار کیا۔
