ایجنسیز
نئی دہلی؍۸جون
بھارتی فضائیہ (آئی اے ایف) نے پیر کے روز بتایا کہ لداخ سے پانچ انتہائی تشویشناک مریضوں‘ جن میں بھارتی فوج کے تین اہلکار بھی شامل ہیں، کو بہتر طبی علاج کے لیے فضائی راستے سے چندی گڑھ منتقل کیا گیا ہے۔
بھارتی فضائیہ کی مغربی فضائی کمان نے سوشل میڈیا پلیٹ فارم ایکس پر ایک پوسٹ میں کہا کہ سال۲۰۲۶ کے دوران صرف لداخ سیکٹر میں ہی فضائی طبی انخلا کارروائیوں کے ذریعے۱۴۳جانیں بچائی جا چکی ہیں۔
فضائیہ کے مطابق یہ اہم طبی انخلا مشن لداخ کے دشوار گزار پہاڑی علاقوں اور خراب موسمی حالات کے باوجود کامیابی سے انجام دیا گیا۔
پوسٹ میں کہا گیا، ’’بھارتی فضائیہ نے لداخ سے ایک اہم طبی انخلا مشن کامیابی کے ساتھ مکمل کیا، جس کے تحت پانچ شدید علیل مریضوں کو مزید بہتر علاج کے لیے چندی گڑھ منتقل کیا گیا۔ ان مریضوں میں بھارتی فوج کے تین اہلکار، ایک زیر کفالت فرد اور ایک لداخی شہری شامل تھے۔‘‘
فضائیہ نے اس مشن کی چند تصاویر بھی جاری کیں اور بتایا کہ خراب موسمی حالات اور بلند پہاڑی علاقوں کے باوجود سی ۱۷؍اور اے این۳۲ طیاروں نے مریضوں کو محفوظ، بروقت اور تیزی سے منتقل کیا۔
بیان میں مزید کہا گیا کہ یہ مشن انسانی جانوں کے تحفظ اور ہنگامی حالات میں مدد فراہم کرنے کے لیے بھارتی فضائیہ کے عزم کا مظہر ہے۔
طبی اصطلاح ’ڈینجرسلی اِل لسٹ‘ ایسے مریضوں کے لیے استعمال کی جاتی ہے جن کی حالت انتہائی نازک اور غیر مستحکم ہو اور جن کے بارے میں یہ خدشہ ہو کہ ان کی صحت مزید بگڑ سکتی ہے یا جان کو فوری خطرہ لاحق ہو سکتا ہے۔
۔۔۔۔۔۔۔۔
