ایجنسیز
جموں؍۸جون
جموں و کشمیر کے ضلع راجوری میں لائن آف کنٹرول (ایل او سی) کے نزدیک دو مختلف مقامات سے پیر کے روز تین مارٹر گولے برآمد ہوئے جنہیں فوج کے بم ناکارہ بنانے والے دستے نے محفوظ طریقے سے ناکارہ بنا دیا۔
حکام کے مطابق دو مارٹر گولے جھنگڑ کے جنگلاتی علاقے میں جبکہ ایک اور مارٹر گولہ نوشہرہ سیکٹر کے مکری گاؤں میں ایک ویران مقام سے برآمد ہوا۔
انہوں نے بتایا کہ فوج کے بم ناکارہ بنانے والے دستے (بم ڈسپوزل اسکواڈ) نے تینوں مارٹر گولوں کو کامیابی اور محفوظ طریقے سے ناکارہ بنا دیا۔
ادھر ایک اور واقعے میں پولیس نے ضلع سانبہ میں بین الاقوامی سرحد کے نزدیک ڈھکی نالہ علاقے سے پاکستان انٹرنیشنل ایئرلائنز کے نشان والا ہوائی جہاز کی شکل کا ایک غبارہ برآمد کیا۔
حکام کے مطابق سفید اور سبز رنگ کا یہ غبارہ مقامی دیہاتیوں نے دیکھا جس کے بعد مقامی پولیس تھانے کی ایک ٹیم نے اسے اپنی تحویل میں لے لیا۔
حکام نے بتایا کہ اس نوعیت کے غبارے اکثر سرحد پار سے بھارتی حدود میں آ جاتے ہیں اور جموں و کشمیر کے سرحدی دیہات سے وقتاً فوقتاً برآمد ہوتے رہتے ہیں۔
