ایجنسیز
سرینگر؍۳ جون
پولیس کے کاؤنٹر انٹیلی جنس کشمیر (سی آئی کے) یونٹ نے بدھ کے روز دہشت گردی سے متعلق ایک مقدمے کے سلسلے میں وادی کشمیر کے مختلف اضلاع میں چھاپہ مار کارروائیاں انجام دیں، حکام نے یہ جانکاری دی۔
حکام کے مطابق حالیہ خفیہ اطلاعات، تکنیکی تجزیے اور مسلسل تحقیقات کی بنیاد پر چھ اضلاع میں آٹھ مقامات کی نشاندہی کی گئی تھی، جہاں بدھ کی علی الصبح تلاشی کارروائیاں انجام دی گئیں۔
انہوں نے بتایا کہ یہ چھاپے سری نگر اور بانڈی پورہ اضلاع میں دو، دو مقامات پر جبکہ کپوارہ، اننت ناگ، کُلگام اور بارہمولہ اضلاع میں ایک، ایک مقام پر مارے گئے۔
یہ مقدمہ سنہ۲۰۱۵میں درج کیا گیا تھا اور اس کا تعلق پاکستان کی سرپرستی میں سرگرم دہشت گرد تنظیموں، ان کے سلیپر سیل نیٹ ورکس اور جموں و کشمیر میں بھرتی، انتہا پسندی کے فروغ اور دہشت گردی کی معاونت سے متعلق سرگرمیوں سے ہے۔
حکام نے بتایا کہ مشتبہ افراد پر الزام ہے کہ وہ خفیہ اور انکرپٹڈ مواصلاتی پلیٹ فارمز کے ذریعے پاکستان میں موجود دہشت گرد ہینڈلرز کے ساتھ رابطے میں تھے۔
انہوں نے مزید کہا کہ یہ افراد انتہا پسندانہ پروپیگنڈے کی تشہیر اور نوجوانوں کو شدت پسندی کی طرف راغب کرنے کی سرگرمیوں میں ملوث ہونے کے شبہ میں زیرِ تفتیش ہیں۔(ایجنسیاں)
