دن کے درجہ حرارت میں گراوٹ‘مزید بارشوں‘ برفباری کا امکان
(ایجنسیز)
سرینگر؍۱۰مارچ
وادی کشمیر میں موسم ایک بار پھر کروٹ بدل چکا ہے۔ پیر اور منگل کی درمیانی شب سے وادی کے بیشتر میدانی علاقوں میں بارشوں کا سلسلہ وقفے وقفے سے جاری ہے جبکہ بالائی علاقوں میں تازہ برفباری ریکارڈ کی گئی ہے۔
محکمۂ موسمیات کے مطابق اگلے۲۴ گھنٹوں کے دوران موسم مزید خراب رہنے کا امکان ہے، جس کے نتیجے میں کئی علاقوں میں ٹریفک کی رفتار بھی متاثر ہوسکتی ہے۔
کشمیر کے بالائی علاقوں میں ہلکی برفباری ہوئی ہے۔ کچھ مقامات پر دو سے چار انچ تک تازہ برف جمع ہو گئی ہے۔ بالائی علاقوں میں برفباری کے بعد سڑکوں پر پھسلن بڑھ گئی ہے، جس کے باعث مقامی انتظامیہ نے مسافروں سے محتاط ڈرائیونگ کی اپیل کی ہے۔
محکمہ موسمیات نے بتایا کہ پیر کی رات سے ہی وادی کے بیشتر میدانی علاقوں، جن میں سری نگر، بارہمولہ، پلوامہ اور اننت ناگ شامل ہیں، میں وقفے وقفے سے بارشوں کا سلسلہ جاری ہے۔ صبح کے وقت کئی علاقوں میں بادلوں کی گرج اور تیز ہوائیں بھی چلتی رہیں۔
مسلسل بارشوں اور بالائی علاقوں میں برفباری کے باعث درجہ حرارت میں نمایاں کمی ریکارڈ کی گئی ہے۔ سری نگر میں کم سے کم درجہ حرارت معمول سے۳سے۴ڈگری کم ریکارڈ کیا گیا جبکہ دیگر اضلاع میں بھی سردی کی شدت میں اضافہ ہوا ہے۔ بارش کے باعث دن کا درجہ حرارت بھی معمول سے نیچے گر گیا ہے، جس سے سردی کی شدت میں مزید اضافہ محسوس کیا جا رہا ہے۔
محکمۂ موسمیات نے پیش گوئی کی ہے کہ اگلے چند گھنٹوں کے دوران بالائی علاقوں میں مزید برفباری اور میدانی علاقوں میں ہلکی سے درمیانی درجے کی بارشوں کا امکان ہے۔ اس دوران کچھ مقامات پر پہاڑی راستوں پر ٹریفک متاثر ہو سکتا ہے۔ ٹریفک پولیس نے مسافروں کو مشورہ دیا ہے کہ وہ غیر ضروری سفر سے گریز کریں اور راستوں کی تازہ صورتحال معلوم کرنے کے بعد ہی سفر کا ارادہ کریں۔
موسم کی اس اچانک تبدیلی نے عام لوگوں کی روزمرہ زندگی پر بھی اثر ڈالا ہے۔ بازاروں میں رش کم ہوا ہے جبکہ اسکول جانے والے بچوں کو سردی کے باعث مشکلات کا سامنا کرنا پڑا۔ تاہم کسانوں نے بارش کو بعض فصلوں کے لیے فائدہ مند قرار دیا ہے
