۔۔۔۔۔
انوج اگنی ہوتری نے پہلی ‘راجیشوری سووے ایم کی دوسری اور اکانش دھل کی تیسری پوزیشن‘وزیر اعظم کی کامیاب امیدواروں کو مبارکباد
(ندائے مشرق ویب ڈیسک )
سرینگر؍۶مارچ
یونین پبلک سروس کمیشن (یو پی ایس سی) کی جانب سے جمعہ کو اعلان کردہ سول سروسز امتحان۲۰۲۵ کے نتائج کے مطابق جموں و کشمیر کے۱۷؍امیدواروں نے امتحان میں کامیابی حاصل کی ہے۔
دستیاب تفصیلات کے مطابق جموں سے تعلق رکھنے والے سُوَن شرما نے۱۴۸ واں رینک حاصل کیا، جبکہ سگندھا گپتا نے۲۰۷واں اور توصیف احمد گنائی نے۲۵۴واں رینک حاصل کیا۔
جموں کشمیر کے دیگر کامیاب امیدواروں میں رتیکا بھان۴۵۶‘سویاش شیوم۵۷۲‘ منیب پرّہ۵۸۱‘ غلام دین۶۶۳‘دوارکا گادھی۷۲۱‘آکاش۷۴۷‘کوہِ صفا ۷۶۳‘یاسر۸۱۱‘ ابھیشیک۸۲۰‘پنکج ۸۵۶‘محمد اعجاز۸۶۹‘اظہر۸۸۶‘سرفراز۹۳۶؍اور عرفان۹۵۷ شامل ہیں۔
ادھر اعلان کردہ سول سروسز امتحان۲۰۲۵کے نتائج کے مطابق انوج اگنی ہوتری نے پہلی پوزیشن حاصل کی۔راجیشوری سووے ایم اور اکانش دھل نے بالترتیب دوسری اور تیسری پوزیشن حاصل کی۔
انوج اگنی ہوتری ایم بی بی ایس گریجویٹ ہیں اور انہوں نے راجستھان کے آل انڈیا انسٹی ٹیوٹ آف میڈیکل سائنسز (ایمز)، جودھپور سے بیچلر آف میڈیسن اینڈ بیچلر آف سرجری(ایم بی بی ایس )کی ڈگری حاصل کی ہے۔ انہوں نے امتحان میں میڈیکل سائنس کو اپنا اختیاری مضمون منتخب کیا تھا۔
راجیشوری سووے ایم نے دوسری پوزیشن حاصل کی۔ انہوں نے انا یونیورسٹی، چنئی سے الیکٹریکل اینڈ الیکٹرانکس انجینئرنگ میں بیچلر آف انجینئرنگ کی ڈگری حاصل کی ہے اور امتحان میں سوشیالوجی کو اختیاری مضمون کے طور پر منتخب کیا تھا۔
اسی طرح اکانش دھل نے تیسری پوزیشن حاصل کی۔ وہ یونیورسٹی آف دہلی سے بیچلر آف کامرس گریجویٹ ہیں اور انہوں نے کامرس اینڈ اکاؤنٹنسی کو اپنا اختیاری مضمون رکھا تھا۔
امتحان میں کامیاب ہونے والے ٹاپ پانچ امیدواروں میں ایک خاتون اور چار مرد امیدوار شامل ہیں۔ راگھو جھنجھن والا نے چوتھی پوزیشن حاصل کی جبکہ ایشان بھٹناغر پانچویں نمبر پر رہے۔
جھنجھن والا نے یونیورسٹی آف دہلی سے معاشیات میں بیچلر آف آرٹس کی ڈگری حاصل کی ہے اور انہوں نے معاشیات کو اختیاری مضمون کے طور پر منتخب کیا تھا۔
ایشان بھٹناغر نے نیشنل لا یونیورسٹی، دہلی سے بی اے ایل ایل بی (آنرز) کی ڈگری حاصل کی ہے اور امتحان میں سوشیالوجی کو اختیاری مضمون کے طور پر منتخب کیا تھا۔نتائج کے مطابق ٹاپ۲۵؍امیدواروں میں۱۱خواتین اور۱۴مرد امیدوار شامل ہیں۔
کمیشن کے مطابق مجموعی طور پر۹۵۸ امیدواروں نے امتحان میں کامیابی حاصل کی ہے‘جن میں۶۵۹مرد اور۲۹۹خواتین شامل ہیں۔ انہیں مختلف مرکزی سول سروسز میں تقرری کے لیے تجویز کیا گیا ہے۔
یو پی ایس سی ہر سال یہ امتحان تین مراحل‘ پریلمینری، مین اور انٹرویو میں منعقد کرتا ہے جس کے ذریعے انڈین ایڈمنسٹریٹو سروس (آئی اے ایس)، انڈین فارن سروس (آئی ایف ایس) اور انڈین پولیس سروس (آئی پی ایس) سمیت دیگر خدمات کے لیے افسران کا انتخاب کیا جاتا ہے۔
کمیشن کے بیان کے مطابق۳۴۸ امیدواروں کی سفارش عارضی طور پر کی گئی ہے۔ مرکز نے اس امتحان کے ذریعے۱۰۸۷اسامیوں کو پُر کرنے کی اطلاع دی تھی۔
دریں اثنا وزیر اعظم نریندر مودی نے سول سروسز کے امتحان میں کامیابی کے ساتھ پاس ہونے والے امیدواروں کو مبارکباد دی ہے اور کے لیے ملک کی خدمت اور عوام کی امنگوں کو پورا کرنے کے سفر میں کامیابی کی تمنا کی ہے۔
سول سروسز کے امتحان کے نتائج کے اعلان کے بعد، مودی نے جمعہ کے روز ایک سوشل میڈیا پوسٹ میں کہا’’ان تمام لوگوں کو مبارک ہو جنہوں نے سول سروسز امتحان‘۲۰۲۵کامیابی سے پاس کیا ہے۔ ان کی لگن، استقامت اور محنت سے یہ اہم کامیابی حاصل ہوئی ہے۔ میں ان سب کے لیے نیک تمناؤں کا اظہار کرتا ہوں‘‘۔
وزیر اعظم نے امتحان میں ناکام ہونے والے امیدواروں سے کہا کہ ملک کی ترقی میں حصہ لینے کے اور بھی بہت سے طریقے ہیں اور ان کے روشن مستقبل کی خواہش کی۔
وزیر اعظم نے ایک دوسری پوسٹ میں کہا، ’’جن لوگوں نے اس امتحان میں اپنے مطلوبہ نتائج حاصل نہیں کیے، میں سمجھتا ہوں کہ ان کے لیے اس طرح کے لمحات مشکل ہو سکتے ہیں۔ لیکن یہ طویل سفر کا صرف ایک مرحلہ ہے۔ مستقبل میں بہت سے مواقع ہیں‘ چاہے اگلے امتحانات ہوں یا ملک کی ترقی میں تعاون کرنے کے دوسرے طریقے ہوں۔ میں ان سب کے روشن مستقبل کے لیے نیک تمناؤں کا اظہار کرتا ہوں‘‘
