ویب ڈیسک
سرینگر؍۴مارچ
بہار کے وزیر اعلیٰ نتیش کمار کے بارے میں اطلاعات ہیں کہ وہ جلد اپنے عہدے سے مستعفی ہو کر راجیہ سبھا کا رخ کر سکتے ہیں۔
این ڈی ٹی وی نے ذرائع کے حوالے سے کہا ہے کہ ان کے بیٹے نشانت کمار کو ریاست کا نائب وزیر اعلیٰ بنایا جا سکتا ہے جبکہ وزیر اعلیٰ کا عہدہ بھارتیہ جنتا پارٹی کے کسی رہنما کو ملنے کا امکان ہے۔
رپورٹ میں کہا گیا ہے کہ یہ بڑی سیاسی تبدیلی آئندہ راجیہ سبھا انتخابات کے دوران سامنے آ سکتی ہے۔ اطلاعات کے مطابق نتیش کمار کل راجیہ سبھا کے لیے اپنا نامزدگی فارم داخل کریں گے اور اس موقع پر مرکزی وزیر داخلہ امت شاہ بھی موجود ہوں گے۔
نتیش کمار کے قریبی ایک رہنما، جن کا تعلق بھی ان کی ذات سے بتایا جا رہا ہے اور جن کا نام بھی راجیہ سبھا کے لیے زیر غور ہے، نے کہا ’’اب سوگ منانے کا وقت ہے، سب کچھ دہلی میں طے ہو چکا ہے‘‘۔ ذرائع کے مطابق نتیش کمار ممکنہ طور پر آئندہ ہفتے استعفیٰ دے سکتے ہیں۔
اگر یہ تبدیلی عمل میں آتی ہے تو بہار کی سیاست میں ایک طویل دور کا خاتمہ ہوگا اور ریاست میں بھارتیہ جنتا پارٹی کو فیصلہ کن کردار مل جائے گا، جس کی وہ طویل عرصے سے خواہاں رہی ہے۔
وزیر اعلیٰ کے عہدے کے لیے بی جے پی کے کئی رہنما زیر غور بتائے جا رہے ہیں جن میں نائب وزیر اعلیٰ سمراٹ چودھری اور مرکزی وزیر مملکت برائے داخلہ نتیانند رائے کو مضبوط دعویدار قرار دیا جا رہا ہے
