لشکر کی دھمکی :دہلی میں دہشت گردی کے خطرے کے پیش نظر سکیورٹی ہائی الرٹ

سرینگر: پاکستان میں مسجد دھماکے کا بدلہ لینے کی دھمکی کے بعد دہلی میں سکیورٹی انتہائی الرٹ کر دی گئی ہے۔ انٹیلی جنس انپٹس کے بعد لال قلعہ اور چاندنی چوک سمیت حساس مقامات پر سکیورٹی کے سخت انتظامات کیے گئے ہیں۔
ایک میڈیا رپورٹ کے مطابق، پاکستان میں۶فروری کو اسلام آباد کی ایک مسجد میں ہونے والے دھماکے کے بعد شدت پسند تنظیم لشکر طیبہ ہندوستان میں بڑے حملے کی منصوبہ بندی کر رہی ہے۔
انپٹس کے مطابق، لشکر طیبہ نے لال قلعہ اور چاندنی چوک کے علاقے میں آئی ای ڈی دھماکے کی منصوبہ بندی کی ہے اور چاندنی چوک کے ایک مندر کو خاص طور پر نشانہ بنایا جا سکتا ہے .
سکیورٹی ایجنسیوں نے بم ڈسپوزل اسکواڈ، ڈاگ اسکواڈ اور فوری ردعمل کی ٹیمیں اسٹریٹجک مقامات پر تعینات کر دی ہیں۔
سی سی ٹی وی مانیٹرنگ، گاڑیوں کی جانچ اور حساس مقامات پر اضافی اہلکار تعینات کیے گئے ہیں . پولیس نے عوام سے اپیل کی ہے کہ وہ چوکس رہیں اور کسی بھی مشکوک سرگرمی کی اطلاع فوری طور پر قریبی پولیس اسٹیشن یا ایمرجنسی سروسز کو دیں .
یہ الرٹ نومبر۲۰۲۵میں لال قلعہ کے قریب ہونے والے مہلک کار دھماکے کے بعد جاری کیا گیا ہے، جس میں کم از کم۱۳؍افراد ہلاک اور۲۰سے زائد زخمی ہوئے تھے . این آئی اے نے اس معاملے کی تحقیقات میں۴۵دنوں کی توسیع حاصل کی ہے اور سات ملزمان کی عدالتی تحویل۱۳مارچ تک بڑھا دی گئی ہے .
رپورٹ میں کہا گیا ہے کہ اگرچہ انٹیلی جنس انپٹس کی تصدیق کی جا رہی ہے، لیکن احتیاطی تدابیر کے طور پر سکیورٹی بڑھا دی گئی ہے اور خوف و ہراس کی کوئی بات نہیں ہے۔