ہمیں پاکستان کے ساتھ کرکٹ میچ نہیں کھیلنا چاہئے:ستیش شرما

جموں: یوتھ سروس اینڈ سپورٹس کے وزیر ستیش شرما کا کہنا ہے کہ ہندوستان کو پاکستان کے ساتھ کرکٹ میچ نہیں کھیلنا چاہئے۔ انہوں نے کہا’’ہمیں کیوں اس ملک کے ساتھ میچ کھیلنا ہے جو ہماری پیٹھ میں چھرا گھونپ رہا ہے‘‘۔
وزیر نے ان باتوں کا اظہار منگل کو یہاں اسمبلی کے باہر نامہ نگاروں کے سوالوں کا جواب دینے کے دوران کیا۔
ہندوستان اور پاکستان کے درمیان کرکٹ میچ کھلینے کے بارے میں پوچھے جانے پر انہوں نے کہا’’آپ ایسے ملک کے ساتھ کیوں کھیل رہے ہیں جو آپ کی پیٹھ میں چھرا گھونپ رہا ہے،ہمیں ان کے ساتھ نہیں کھیلنا چاہیے، میں اس کے حق میں نہیں ہوں‘‘۔انہوں نے کہا’’وہ ہمارے جوانوں کو شہید کر رہے ہیں، کئی کشمیریوں کو شہید کیا، جموں کے کئی لوگوں کو شہید کیا‘‘۔
شرما نے کہا کہ یہ وہ لوگ ہیں جو ہمیں دن رات لوٹ رہے ہیں۔انہوں نے کہا’’ہم محبت کرنے والے لوگ ہیں، ہم جانتے ہیں کہ جب بھی نفرت کو شکست ہوتی ہے تو محبت سے ہوتی ہے، نفرت سے نفرت کو شکست نہیں ہوتیُُ‘‘۔
ایل او پی سنیل شرما کے بارے میں پوچھے جانے والے ایک سوال کے جواب میں انہوں نے کہا’’میں نے ایل او پی سے تحریری طور پر معافی مانگنے کا مطالبہ کیا اور ان سے کہا کہ وہ ریاستی درجے کی بحالی کے لئے لڑائی میں میرے ساتھ شامل ہوجائے، میں حق کے لئے جان دینے کے لئے تیار ہوں۔‘‘