ہر ڈالا گیا ووٹ ہماری قوم کی عمارت کی بنیاد بنتا ہے:سنہا 

جموں: لیفٹیننٹ گورنر‘ منوج سنہا نے آج جموں میں۱۶ویں قومی یومِ رائے دہندگان کی تقریبات میں شرکت کی۔
اس موقع پر خطاب کرتے ہوئے لیفٹیننٹ گورنر نے افسران سے کہا کہ وہ شہریوں میں اپنے حقِ رائے دہی کی گہری طاقت سے متعلق بیداری پیدا کریں اور انہیں دانش مندی کے ساتھ اس کے استعمال کے لیے ترغیب دیں، تاکہ وہ ایک مضبوط، منصفانہ اور خوشحال بھارت کی تعمیر میں حقیقی معمار بن سکیں۔
لیفٹیننٹ گورنر نے کہا’’ہر ڈالا گیا ووٹ ہماری قوم کی عمارت کی بنیاد بنتا ہے۔ اس طرح انتخابات محض موجودہ انتخاب نہیں بلکہ آنے والی نسلوں، اجتماعی تقدیر اور جمہوری استحکام کے لیے ہماری مقدس ذمہ داری کی نمائندگی کرتے ہیں‘‘۔
ان کاکہنا تھا’’حقِ رائے دہی احتساب، شفافیت اور حکومت کی جوابدہی کو مضبوط بناتا ہے۔ میں پختہ یقین رکھتا ہوں کہ ووٹ شہری کی امنگ، یقین اور مقصد کا طاقتور اظہار ہے۔ جموں و کشمیر کو یہ کبھی نہیں بھولنا چاہیے کہ جمہوریت کی اصل روح یہی ہے کہ ہماری اجتماعی مرضی ہی قوم کے راستے کا تعین کرتی ہے‘‘۔
سنہا نے کہا کہ ہر ووٹ میں پالیسیوں، اداروں اور قومی سمت کو شکل دینے کی طاقت موجود ہے۔ ذمہ داری کے ساتھ استعمال کیا گیا بیلٹ قوم کی تقدیر طے کرنے کا سب سے مؤثر ذریعہ بن جاتا ہے۔
لیفٹیننٹ گورنر نے کہا’’دنیا کی سب سے بڑی جمہوریت بھارت نے مساوات اور ہم آہنگی کو فروغ دیتے ہوئے غیر معمولی کامیابیاں حاصل کی ہیں۔ ہماری جمہوری بنیادیں گہرائی اور مضبوطی میں بے مثال ہیں۔ اگرچہ کئی ممالک نے ہمارے ساتھ آزادی حاصل کی، لیکن جمہوریت نے سب سے زیادہ مضبوطی کے ساتھ بھارتی سرزمین پر فروغ پایا‘‘۔
ایل جی نے اُن نوجوانوں اور شہریوں کو مبارکباد دی جنہیں دہائیوں بعد پہلی بار اپنے حقِ رائے دہی کے مکمل استعمال کا موقع ملا۔
سنہا نے الیکشن کمیشن آف انڈیا اور چیف الیکٹورل آفس، جموں و کشمیر کو۲۰۲۴کے تاریخی لوک سبھا اور جموں و کشمیر قانون ساز اسمبلی انتخابات کے کامیاب انعقاد پر سراہا۔
لیفٹیننٹ گورنر نے کہا’’جموں و کشمیر میں جمہوریت پر اعتماد مستحکم ہوا ہے اور جمہوری اقدار گہرائی سے راسخ ہو چکی ہیں۔۲۰۲۴میں بے مثال عوامی شرکت اس بات کی تصدیق ہے کہ شہری ووٹ کو محض حق نہیں بلکہ فرض سمجھتے ہیں‘‘۔
اس موقع پر لیفٹیننٹ گورنر نے افسران اور عوام کو قومی یومِ رائے دہندگان کا حلف بھی دلایا۔
لیفٹیننٹ گورنر نے جموں و کشمیر بھر سے تعلق رکھنے والے ڈسٹرکٹ الیکشن افسران، سول اور پولیس انتظامیہ کے سینئر افسران، یوتھ آئیکنز اور دیگر متعلقہ محکموں کو اعزازات سے نوازا۔ انہوں نے نئے ووٹروں میں الیکٹرز فوٹو شناختی کارڈز بھی تقسیم کیے۔
تقریبات کے دوران فنکاروں، سماجی تنظیموں کے اراکین اور نوجوانوں کی جانب سے شاندار ثقافتی پیشکشیں کی گئیں، جن میں ووٹ کی اہمیت کو تخلیقی انداز میں اجاگر کیا گیا۔ ان پیشکشوں کو لیفٹیننٹ گورنر کی جانب سے خصوصی سراہنا ملی۔
تقریب میں چیف الیکشن کمشنر آف انڈیا شری گیانیش کمار کا ویڈیو پیغام بھی پیش کیا گیا۔