عالمی چیلنجوں کے باوجود ہندوستان آج دنیا کی سب سے تیز رفتار ترقی کرنے والی معیشت ہے‘تیسری بڑھی معیشت بن رہے ہیں‘
نئی دہلی: دنیا کے مختلف خطوں میں بڑھتی ہوئی جغرافیائی سیاسی کشیدگی کے درمیان صدر جمہوریہ دروپدی مرمو نے اتوار کو کہا کہ بھارت دنیا میں امن کا پیغام پھیلا رہا ہے، جو انسانیت کے مستقبل کے تحفظ کے لیے نہایت ضروری ہے۔
۷۷ویں یومِ جمہوریہ کی شام قوم سے اپنے خطاب میں صدر مرمو نے آپریشن سندور، خواتین کو بااختیار بنانے، وندے ماترم اور ملک کی تیزی سے بڑھتی ہوئی معیشت سمیت مختلف امور پر اظہارِ خیال کیا۔
صدر جمہوریہ نے بھارت کو امن کا ایک ’پیامبر‘ قرار دیتے ہوئے عالمی ہم آہنگی کے لیے قدیم تہذیبی عزم کو اجاگر کیا۔
انہوں نے کہا’’ہماری روایت میں پوری کائنات میں امن کے قیام کے لیے دعائیں شامل رہی ہیں۔ انسانیت کا مستقبل اسی صورت میں محفوظ رہ سکتا ہے جب پوری دنیا میں امن ہو۔ایسے ماحول میں، جہاں دنیا کے کئی حصے تنازعات کی زد میں ہیں، بھارت امن کا پیغام پھیلا رہا ہے‘‘۔
خطاب کے دوران صدر مرمو نے قومی سلامتی کے لیے بھارت کے مضبوط عزم کا بھی اعادہ کیا اور سرحد پار دہشت گردی کے خلاف کامیاب کارروائی آپریشن سندور کا خصوصی ذکر کیا، جس کے تحت دہشت گردوں کے ڈھانچے کو نشانہ بنایا گیا۔
صدر جمہوریہ نے کہا’’گزشتہ برس ہمارے ملک نے دہشت گردی کے ڈھانچے کے خلاف درست اور ہدفی حملے کیے‘ دہشت گرد مراکز تباہ کیے گئے اور کئی دہشت گرد انجام کو پہنچے‘‘۔انہوں نے کہا کہ آپریشن سندور کی تاریخی کامیابی کے پیچھے دفاع کے شعبے میں ملک کی خود انحصاری کارفرما رہی۔
مسلح افواج کی طاقت پر روشنی ڈالتے ہوئے صدر نے سیاچن بیس کیمپ کے اپنے دورے، سخوئی اور رافیل طیاروں میں پرواز اور آبدوز آئی این ایس واگھشیر میں شرکت کو بھی یاد کیا۔
انہوں نے کہا’’فوج، فضائیہ اور بحریہ کی طاقت کی بنیاد پر عوام کو ہماری دفاعی تیاریوں پر مکمل اعتماد ہے’’ اور کہا کہ یہی مضبوطی بھارت کو طاقت کی بنیاد پر امن کی وکالت کا حوصلہ دیتی ہے‘‘۔
صدر مرمو نے اپنے خطاب میں ناری شکتی (خواتین کی طاقت) کو۲۰۴۷ تک بھارت کو ایک ترقی یافتہ ملک بنانے کے سفر کی بنیاد قرار دیا۔انہوں نے زور دے کر کہا کہ’’ملک کی ترقی کے لیے خواتین کی فعال اور بااختیار شمولیت بے حد ضروری ہے‘‘۔انہوں نے کہا کہ دیہی خود امدادی گروپوں سے لے کر خلا اور دفاع کے میدان تک، جدید بھارت کی کہانی اب اس کی بیٹیوں کے ہاتھوں لکھی جا رہی ہے۔
صدر نے بتایا کہ اس وقت۱۰کروڑ سے زائد خواتین خود امدادی گروپوں سے وابستہ ہیں، جو نچلی سطح کی معیشت کی نئی تعریف کر رہی ہیں۔انہوں نے کہا کہ پنچایتی راج اداروں میں تقریباً۴۶فیصد نمائندے خواتین ہیں اور ناری شکتی وندن ادھینیم سیاسی بااختیاری کو’بے مثال بلندیوں‘ تک لے جانے والا ہے، جس سے خواتین کی قیادت میں ترقی قومی ترجیح بنے گی۔
صدر مرمو نے کہا کہ گزشتہ سال عالمی سطح پر بھارتی خواتین کے لیے ایک “سنہری باب” ثابت ہوا، اور انہوں نے کھیلوں میں بھارتی خواتین کی شاندار کامیابیوں کا حوالہ دیا، جن میں آئی سی سی ویمنز کرکٹ ورلڈ کپ میں تاریخی فتح اور بلائنڈ ویمنز ٹی۲۰ورلڈ کپ میں کامیابی شامل ہے۔انہوں نے کہا کہ خواتین مسلح افواج، خلائی تحقیق اور کاروبار میں بھی نمایاں کردار ادا کر رہی ہیں، جس سے یہ ثابت ہوتا ہے کہ اب ملک میں کوئی بھی شعبہ خواتین کے لیے “روایتی حد” تک محدود نہیں رہا۔
صدر نے بیٹی بچاؤ، بیٹی پڑھاؤ مہم کو ملک بھر میں لڑکیوں کی تعلیم کو فروغ دینے کا مؤثر ذریعہ قرار دیا۔انہوں نے کہا’’خواتین کی بڑھتی ہوئی شراکت کے ساتھ ہمارا ملک صنفی مساوات پر مبنی ایک ہمہ گیر جمہوریہ کی مثال قائم کرے گا‘‘۔ اور واضح کیا کہ وکست بھارت کا مستقبل خواتین کے بااختیار ہونے سے جڑا ہوا ہے۔
صدر مرمو نے غربت کے خاتمے میں بھارت کی نمایاں پیش رفت کا بھی ذکر کیا اور کہا کہ وہ لاکھوں افراد، جو دہائیوں تک غربت کا شکار رہے، اب خطِ غربت سے اوپر آ چکے ہیں۔انہوں نے کہا کہ انتودیہ کے جذبے کے تحت حکومت اس بات کو یقینی بنا رہی ہے کہ یہ شہری دوبارہ غربت کے جال میں نہ پھنسیں۔انہوں نے اس بنیادی اصول کا اعادہ کیا کہ’’ہمارے ملک میں کوئی بھی بھوکا نہ رہے‘‘اور کہا کہ مرکزی حکومت کی مختلف اسکیموں کے تحت تقریباً۸۱ کروڑ مستحقین کو ضروری مدد فراہم کی جا رہی ہے۔
صدر نے زور دیا کہ وکست بھارت کا راستہ ہمہ گیر ہونا چاہیے اور قبائلی و پسماندہ طبقات پر خصوصی توجہ کے ساتھ ہدفی اقدامات کیے جانے چاہئیں۔انہوں نے کہا’’غریبوں کی فلاح کے لیے یہ کوششیں مہاتما گاندھی کے تصورِ سروودیہ (سب کی ترقی) کو عملی شکل دیتی ہیں‘‘۔صدر مرمو نے اعلان کیا کہ آئینِ ہند اب آٹھویں شیڈول میں شامل تمام۲۲ زبانوں میں دستیاب ہے، جس کا مقصد ’آئینی قوم پرستی‘ کو فروغ دینا ہے تاکہ شہری اپنی مادری زبان میں ملک کی بنیادی دستاویز سے جڑ سکیں۔
مرمو نے کہا کہ یہ اقدام باہمی اعتماد پر مبنی اچھی حکمرانی کی جانب ایک بڑے سفر کا حصہ ہے، جہاں ٹیکنالوجی اور قانون سازی کے ذریعے حکومت اور عوام کے درمیان فاصلے کو مسلسل کم کیا جا رہا ہے۔
صدر نے بتایا کہ انتظامیہ نے شہری مرکزیت پر مبنی ماڈل اپناتے ہوئے غیر ضروری قواعد و ضوابط کو ختم کیا ہے اور ہزاروں بے فائدہ قوانین کو منسوخ کیا گیا ہے۔انہوں نے کہا کہ قومی اہداف اب عوامی شرکت کے ذریعے حاصل کیے جا رہے ہیں، جس سے سرکاری مہمات طاقتور عوامی تحریکوں میں تبدیل ہو رہی ہیں۔
اس ’انقلابی تبدیلی‘ کی نمایاں مثال بھارت کی ڈیجیٹل معیشت میں عالمی قیادت ہے، جہاں آج دنیا کے نصف سے زیادہ ڈیجیٹل لین دین بھارت میں ہو رہے ہیں۔صدر مرمو نے کہا کہ وکست بھارت کی تعمیر ایک مشترکہ ذمہ داری ہے اور ہر گاؤں و شہر کے مقامی اداروں کو ترقی پسند تبدیلی کا ذریعہ بننا ہوگا۔انہوں نے ثقافتی نوآبادیاتی ذہنیت کے خاتمے کی جانب بھی اشارہ کیا اور کہا کہ حکومت مقررہ مدت میں ’’نوآبادیاتی سوچ کے اثرات‘‘کو ختم کرنے کے لیے پُرعزم ہے۔
صدر نے کہا کہ آج کا بھارت اپنی شاندار روایات اور گیان بھارتَم (علم پر مبنی بھارت) کے تصور کے ساتھ نئے اعتماد کے ساتھ آگے بڑھ رہا ہے۔انہوں نے کہا کہ خود انحصاری صرف معاشی نہیں بلکہ ثقافتی بھی ہے، اور بھارتی زبانوں و دیسی علمی نظاموں کو فروغ دے کر مکمل خود انحصاری کی بنیاد رکھی جا رہی ہے۔
صدر مرمو نے بھارت کو دنیا کی تیزی سے ترقی کرتی بڑی معیشت قرار دیا اور کہا کہ یہ مضبوطی گہرے ساختی اصلاحات اور خود انحصاری کے عزم کا نتیجہ ہے۔عالمی معاشی غیر یقینی کے باوجود بھارت جلد دنیا کی تیسری سب سے بڑی معیشت بننے کی راہ پر گامزن ہے۔انہوں نے کہا کہ معاشی انضمام میں سب سے بڑا قدم آزادی کے بعد جی ایس ٹی کی صورت میں اٹھایا گیا، اور تیسری بڑی معیشت بننے کا سفر آتم نربھرتا اور سودیشی کے اصولوں کی رہنمائی میں طے کیا جا رہا ہے۔
صدر نے وندے ماترم کی تخلیق کے۱۵۰ برس مکمل ہونے کی تقریبات کا بھی ذکر کیا اور کہا کہ آزادی کی جدوجہد کے دوران اس ترانے نے لسانی حدود سے بالاتر ہو کر عوام کو متحد کیا۔انہوں نے کہا کہ مختلف بھارتی زبانوں میں اس کے تراجم نے اسے قومی یکجہتی کی علامت بنا دیا ہے۔
صدر مرمو نے کہا’’شمال سے جنوب اور مشرق سے مغرب تک ہماری قدیم ثقافتی وحدت کا تانا بانا ہمارے آباؤ اجداد نے بُنا تھا۔ وندے ماترم کے ذریعے اس یکجہتی کے جذبے کو فروغ دینے کی ہر کوشش قابلِ تحسین ہے۔‘‘(ایجنسیاں)
