بی جے پی کے قومی صدر کے لیے نامزدگی کا عمل شروع، نتن نبین کا صدر بننا طے

نئی دہلی، 19 جنوری (یواین آئی)
بھارتیہ جنتا پارٹی (بی جے پی) کے قائم مقام صدر نتن نبین کی جانب سے پارٹی کے قومی صدر کے عہدے کے لیے نامزدگی کا عمل پیر کو دوپہر دو بجے شروع ہوا۔
بی جے پی کے قومی صدر کے لیے نامزدگی کے دن آج دارالحکومت میں پارٹی ہیڈکوارٹر پر اعلیٰ رہنماؤں، بی جے پی کی حکومت والی ریاستوں کے وزرائے اعلیٰ، صوبائی صدور اور مرکزی وزراءکا اجتماع ہوا۔
دوپہر دو بجے سے شام چار بجے تک نامزدگی کے لیے مقررہ وقت کے آغاز میں پارٹی کے صدر جے پی نڈا، سابق صدر راجناتھ سنگھ، امیت شاہ اور نتن گڈکری نے دیگر سینئر رہنماؤں کے ساتھ انتخابی افسر ڈاکٹر کے لکشمن کو نتن نبین کے نام کی تجویز کا پرچہ پیش کیا۔
ان کے ساتھ مرکزی وزراءکرن رجیجو، دھرمیندر پردھان، بھوپندر یادو اور کچھ دیگر بی جے پی رہنما بھی موجود تھے ۔
بی جے پی کی صوبائی اکائیوں کی جانب سے بھی نتن نبین کے نامزدگی کے حمایت نامے پیش کیے گئے ۔ پارٹی ہیڈکوارٹر پر مرکزی وزیر جی کشن ریڈی اور منوہر لال کھٹر بھی موجود تھے ۔
صدر کے عہدے کے لیے موصولہ نامزدگی فارموں کی جانچ شام چار سے پانچ بجے تک کی جائے گی اور شام چھ بجے تک نام واپس لیے جا سکیں گے ۔
پارٹی کے ذرائع نے بتایا کہ قومی صدر کے طور پر نتن نبین کے منتخب قرار دیے جانے کی صرف رسمی کارروائی باقی ہے ۔ ان کے مطابق اس عہدے کے لیے کسی دوسرے امیدوار کے نامزدگی داخل کرنے کا امکان نہ ہونے کے برابر ہے ۔
بی جے پی کے صدر کے انتخاب کے جاری پروگرام کے مطابق اگر صدر کے لیے ایک سے زیادہ امیدوار ہوں گے تو منگل 20 جنوری کو ووٹنگ کرائی جائے گی۔ پارٹی کے ذرائع نے کہا کہ انتخابی افسر آج شام چھ بجے کے بعد بلا مقابلہ منتخب صدر کے نام کا اعلان کر سکتے ہیں۔
نامزدگی کا عمل شروع ہونے سے پہلے اتر پردیش کے وزیر اعلیٰ یوگی آدتیہ ناتھ، ہریانہ کے وزیر اعلیٰ نایب سنگھ سینی، راجستھان کے وزیر اعلیٰ بھجن لال شرما، اتراکھنڈ کے وزیر اعلیٰ پشکر سنگھ دھامی، گوا کے وزیر اعلیٰ پرمود ساونت اور مدھیہ پردیش کے وزیر اعلیٰ موہن یادو سمیت بی جے پی کے کئی دیگر سینئر رہنما پارٹی ہیڈکوارٹر پہنچ گئے تھے ۔